«Արսենալ»: Վենգերի համառության հետևանքները

Տեսնելով, թե ինչ իրավիճակում է գտնվում Լոնդոնի «Արսենալը», չեմ նախանձում «զինագործների» երկրպագուներին: Այն ինչ կատարվում է թիմում այս մրցաշրջանի սկզբից մինչև հիմա, միանշանակ թիմի գլխավոր մարզիչ Արսեն Վենգերի մեղավորությունն է:
Պարզաբանեմ թե ինչու՞:

ՊԱՀԱՆՋՎՈՂ, ԲԱՅՑ ՉԿԱՅԱՑԱԾ ՏՐԱՆՍՖԵՐՆԵՐ

«Արսենալը» եվրոպական Թոփ-5 առաջնությունների միակ ակումբն է, որն ամառային տրանսֆերային պատուհանի ընթացքում գնել է ընդամենը մեկ ֆուտբոլիստի տրանսֆեր` Պետր Չեխ: Եվ դա այն դեպքում, որ նույնիսկ հասարակ ֆուտբոլասերը տեսնելով «Արսենալի» հիմնական կազմի խաղացողներին հասկանում է, որ թիմն առնվազն 3 նոր ֆուտբոլիստի կարիք ունի` յուրաքանչյուր գոտում մեկական: Գրեթե ամբողջ ֆուտբոլային աշխարհը` փորձագետները, լրագրողները, նախկին «արսենալցիները», կոչ էին անում ֆրանսիացի մասնագետին թիմի կազմն ուժեղացնելու, սակայն վերջինս մնաց իր մտքին:


ՎՆԱՍՎԱԾՔՆԵՐԸ

Մինչև կիրակնօրյա «Նորվիչի» դեմ արտագնա հանդիպումը` «Արսենալի» կազմում վնասվածքներ ունեին`  Ֆրանսիս Կոկլեն, Ջեք Ուիլշերը, Թոմաշ Ռոսիցկին, Թեո Ուոլքոտը, Դանի Ուելբեքը, Միկել Արտետան: Վերոհիշյալ խաղից հետո վնասվածք ստացած ֆուտբոլիստների թիվն ավելացավ ևս երեքով` Ալեքսիս Սանչես, Սանտի Կասորլա, Լորան Կոսյելնի:

Իսկ հիմա մի հետաքրքիր փաստ. 2015 թվականի ընթացքում Լոնդոնի  «Արսենալի» բոլոր ֆուտբոլիստները` բացառությամբ Ջոել Քեմբելի, վնասվածք են ստացել: Հատկանշական է այն, որ այդ  վնասվածքների կեսից ավելին մկանային են: Իսկ դա նշանակում է, որ կամ ֆուտբոլիստներին շատ են ծանրաբեռնում, կամ ակումբի բժիշկները լավ չեն կատարում վերականգնողական պրոցեսները: Անձամբ ես ավելի հակված եմ առաջին տարբերակին:
Գրեթե մեկ շաբաթ առաջ Արսեն Վենգերը հայտարարեց, որ Սանչեսը բավականին հոգնած տեսք ունի խաղադաշտում և շատ հնարավոր է նրան հանգստի հնարավորություն տրվի: Սակայն չիլիացի կիսապաշտպանը ո՛չ միայն հանգստի հնարավորություն չստացավ, այլ գրեթե 3 հանդիպում անցկացրեց առանց փոխարինման: Իսկ «Նորվիչի» դեմ խաղում արդեն հանդիպման 60-րդ րոպեին վնասվածք ստացավ: Նախնական ախտորոշմամբ Սանչեսը ձգել է ազդրի հետևի մկանը:  Այս առիթով իր դժգոհությունն է հայտնել նաև «Արսենալի» նախկին ֆուտբոլիստ, այժմ բրիտանական «Sky Sports»-ի փորձագետ` Թիերի Անրին: Հատկապես նա նշել է, որ ՉԼ-ի խաղարկության Զագրեբի «Դինամոյի» դեմ խաղում, երբ  թիմն արդեն 69-րդ րոպեի դրությամբ հաշվի մեջ առաջ էր 3 գնդակի տարբերությամբ` Արսեն Վենգերը կարող էր խաղի ավարտից 20 րոպե առաջ փոխարինել Ալեքսիս Սանչեսին:

Իսկ հիմա Արսեն Վենգերը փորձում է արդարանալ ասելով. թե ոչ մի բժիշկ և ոչ մի բժշկական հետազոտություն չի կարող գուշակել թե ֆուտբոլիստն երբ վնասվածք կստանա: Կարծում եմ Արսեն Վենգերի այս խոսքերն ոչ այլ ինչ են քան, խուճապահար մարզչի արդարացումներ:




Ամեն դեպքում այսքան բացասական իրադարձություններից բացի, կա նաև դրական լուր «զինագործների» երկրպագուների համար: Աարոն Ռեմսին և Ալեքս Օքսլեյդ-Չեմբերլենը լիովին ապաքինվել են վնասվածքներից և պատրաստ են լրացնել «Արսենալի» կիսապաշտպանությունում տիրող բացը:

Եվս մեկ միջադեպ, որը կապված է «Արսենալի», իսկ ավելի կոնկրետ թիմի գլխավոր մարզիչ Արսեն Վենգերի մեղմ ասած  տարօրինակ որոշման հետ:
Բանն այն է, որ նույն «Նորվիչի» դեմ հանդիպմանը «Արսենալը» մեկնել է օդանավով: Լոնդոնից մինչև Նորվիչ ընկած հեռավորությունը կազմում է 150 կմ: Բնականաբար այդ տարածությունը ցամաքային տրանսպորտով անցնելու համար կպահանջվի ոչ ավեի քան երկու ժամ:  Չնայած այդ հանգամանքին, թիմը Նորվիչ  հասել է օդային ճանապարհով, իսկ թռիչքի տևողությունը կազմել է ընդամենը 14 րոպե: Վենգերի այս որոշումը անկասկած դժգոհություն է առաջացրել նախ բնապահպանների, հետո էլ երկրպագուների մոտ:


ՀԱՎԱՆԱԿԱՆ ՏՐԱՆՍՖԵՐՆԵՐ

Հասկանալի է, որ ձմեռային տրանսֆերային պատուհանի ժամանակ բավականին դժվար է ձեռք բերել աստղային ֆուտբոլիստի: Բայց կան հավանական տարբերակներ, որոնք կարող են ուժեղացնել «Արսենալի» կազմը և բարձրացնել թիմում մրցակցության մակարդակը: Վերջին շրջանում «Արսենալի» հետ են կապում այնպիսի ֆուտբոլիստների անուններ, ինչպիսիք են` Ջոն Սթոունսը, Լարս Բենդերը և Ալեքսանդր Կոկորինը: Ինչպես հասկացաք` պաշտպան, կիսապաշտպան և հարձակվող (սա այն է ինչ «Արսենալին» անհրաժեշտ է, համենայնդեպս հիմա):

Հ.Գ.  Կարծում եմ վերջին մի քանի տարիների ընթացքում երևի թե առաջին անգամ «Արսենալը» կարող է լրջորեն պայքարել չեմպիոնության համար: Այդ իսկ պատճառով էլ Արսեն Վենգերը պետք է փորձի առավելագույնս կառչել այս հնարավորությունից շուտափույթ կերպով շտկել իրավիճակը:

Ֆուտբոլի պատմության ամենատարօրինակ և անհավանական գոլային հրավառությունները

«Լեսթեր Սիթիի» հարձակվող Ջեյմի Վարդիի գոլը «Մանչեսթեր Յունայթեդի» դարպասը ռեկորդային էր` Վարդին արդեն 11 խաղ անընդմեջ դառնում է գոլի հեղինակ. այդպիսով գերազանցելով Ռուդ վան Նիստելռոյի 2003 թվականին գրանցած արդյունքը:

 Բացի այդ, Լոնդոնի   «Արսենալի» գերմանացի կիսապաշտպան Մեսութ Օզիլն ևս իր անունը գրեց Պրեմիեր Լիգայի պատմության մեջ` 7 խաղ անընդմեջ դառնալով գոլային փոխանցման հեղինակ:


Իսկ հիմա ձեզ ենք ներկայացնում ամենաանհավանական և տարօրինակ գոլային հրավառությունները:


ՌԵԿՈՐԴՆԵՐ ՎԱՐԴԻԻ ՀԱՄԱՐ

Ռուդ վան Նիստելռոյն իր ռեկորդը գրանցել է 2 մրցաշրջանում: Նա իր առաջին գոլը խփել է նույն տարվա մարտ ամսին, իսկ վերջինը` օգոստոսին:
Իսկ Ջեյմի Վարդին ունիկալ է նրանով, որ նույն առաջնության յուրաքանչյուր խաղում դառնում է գոլի հեղինակ և այդպես արդեն 11 խաղ շարունակ: Սակայն եթե նա ցանկանում է անգլիական ֆուտբոլի բացարձակ ռեկորդ սահմանել այդ ցուցանիշով, ապա պետք է շատ չարչարվի: 1931-32 թթ մրցաշրջանում Ջիմի Դյուենը ռեկորդ է սահմանել` մեկ մրցաշրջանում 12 անընդմեջ խաղում գոլեր հեղինակելով: Իսկ 1950-1951թթ մրցաշրջանում Ստեն Մորտենսենը 15 խաղ անընդմեջ դարձել է գոլի հեղինակ, բայց պետք է նշել այն, որ նա այդ ընթացքում մի քանի խաղ բաց է թողել վնասվածքի պատճառով: Առողջանալուց հետո արդեն շարունակել է  գոլեր խփել:



Մյունխենի  «Բավարիայի» լեհ ֆուտբոլիստ Ռոբերտ Լեվանդովսկին նույնիսկ հարձակվողի համար անհավանական արդյունքի է հասել: Նա ռեկորդակիր է Բունդեսլիգայում ամենաշուտը 100 գոլի սահմանը հատած ֆուտբոլիստների մեջ: Իսկ այս մրցաշրջանում Լեվանդովսկին ակումբի և հավաքականի կազմում ընդհանուր անցկացրած 22 խաղում դարձել է 25 գոլի հեղինակ:


ՀԱԶԱՐԱՊԵՏԵՐԻ ԱԿՈՒՄԲ

Լեգենդար Պելեն  Բրազիլիայի հավաքականի կազմում հաղթել է 3 Աշխարհի Առաջնություններում: Նա շատերի կողմից համարվում է բոլոր ժամանակների լավագույն ֆուտբոլիստը: Հենց նրան է պատկանում ամենաշատ խփած գոլերի ռեկորդը: Պելեն 1956 թվականի սեպտեմբերի 7-ից մինչև 1977 թվականի հոկտեմբերի 1-ն ընկած ժամանակահատվածում անցկացրել է 1363 խաղ դառնալով 1279 գոլի հեղինակ:

  Ամենաբարեբեր տարին Պելեի համար եղել է 1959-ը երբ նա խփել է  126 գոլ:

Պետք է նաև նշել մեկ այլ բրազիլացու` Ռոմարիոյի անունը: Նա հենց իր հաշվարկներով 2007 թվականին խփել է իր կարիերայի 1000-րդ գոլը: Այդ գոլերի ցուցակում Ռոմարիոն ընդգրկել է 77 գոլ, որոնք խփել է պատանեկան տարիքում և 21 գոլ`  բարեգործական խաղերում:


Եվս մեկ բրազիլացի` Արտուր Ֆրիդենրայխ: Նա` համաձայն Գինեսի Ռեկորդների գրքի, 1909-1935թթ ընկած ժամանակահատվածում դարձել է 1329 գոլի հեղինակ: Բայց այս փաստը չի հաստատվել ՖԻՖԱ-ի կողմից:



ԱՄԵՆԱՇԱՏ ԽՓԱԾ ԳՈԼԵՐ ՄԵԿ ԽԱՂՈՒՄ

Այս տարվա հուլիս ամսին Ջին Կալտակն «Օլիմպիական խաղերի» անցումային փուլի` «Վանուատու» - «Միկրոնեզիա» խաղի ժամանակ, տանտերերի կազմում դարձել է 16 գոլի հեղինակ, իսկ խաղն ավարտվել է 46:0 հաշվով: Բայց քանի որ, այդ խաղն անցկացվում էր մինչև 23 տարեկանների հավաքականների մակարդակով, Կալտակի ցուցադրած արդյունքը պաշտոնապես չի ընդունվել:



Նմանատիպ կերպով հավաքականների խաղի ժամանակ ավստրալիացի Արչի Թոմսոնը համաշխարհային ռեկորդ է գրանցել: Նա մեկ խաղի ընթացքում դարձել է 13 գոլի հեղինակ (8-ը` մինչև ընդմիջումը), իսկ իր թիմը հաղթել է 31:0 հաշվով: Խաղը անցկացվում էր 2002 թվականի Աշխարհի Առաջնության ընտրական փուլի շրջանակներում:

2007 թվականին կիպրոսցի հարձակվող Պանայոտիս Պոնտիկոսը մեկ խաղի ընթացքում խփել է ռեկորդային 16 գոլ` «ՍԷԿ Ագիոս Աֆանասիոս» ակումբի կազմում (թիմը հանդես էր գալիս հունական 3-րդ դիվիզիոնում):

Նմանատիպ արդյունք գրանցել էր նաև Ստեֆան Ստանիսը,  1942 թվականին Ֆրանսիայի Գավաթի «Ռասինգ» - «Օբրի» խաղի ժամանակ:

Անգլիացի Ջո Պեյնն անգլիական Ֆուտբոլային Լիգայի ռեկորդակիր է համարվում` մեկ խաղում խփած գոլերի քանակով: Նա 1936 թվականին 10 գոլ է խփել «Բրիստոլ Ռովերսի» դարպասն, իսկ իր ակումբը` «Լուտոն Թաունը» հաղթել է 12:0 հաշվով:

ԳԵՐԱԶԱՆՑԵԼՈՎ ՎԱՐԿՅԱՆԱՉԱՓԸ

Նավաֆ Ալ Աբեդը համարվում է ֆուտբոլի պատմության մեջ ամենաարագ գոլի հեղինակը: Նա հանդիպման մեկնարկից 2.4 վարկյան հետո դարձել է գոլի հեղինակ:
Նա 2009 թվականին  «Ալ Խիլյաալ» - «Ալ Շոալախ» խաղի ժամանակ 60 մետրից գրավել է հյուրերի դարպասը:

Գինեսի ռեկորդների գրքում այդպիսի փաստ առաջին անգամ ավելացվել է 2004 թվականին` երբ սիրողական ֆուտբոլով զբաղվող Մարկ Բերրուզը, ով խաղում էր «Կաուզ Սպորստսի» կազմում, դարձել է գոլի հեղինակ հանդիպման մեկնարկային սուլիչից 2.5 վարկյան անց:


Նիկլաս Բենդտներն, ով հանդես է եկել «Արսենալում», չի կարող պարծենալ «զինագործների» կազմում մեծ թվով խփած գոլերի քանակով : Սակայն դանիացի հարձակվողն ունի պարծենալու այլ առիթ: Նա Պրեմիեր Լիգայի պատմության մեջ ռեկորդ է գրանցել` փոխարինման դուրս գալուց  ընդամենը 6 վարկյան հետո դառնալով գոլի հեղինակ:


ՀԵՌՈՒ ՏԱՐԱԾՈՒԹՅՈՒՆՆԵՐԻՑ ԽՓՎԱԾ ԳՈԼԵՐ

Ասմիր Բեգովիչն, ով հիմա պաշտպանում է Լոնդոնի «Չելսիի» գույները, ժամանակին խաղացել է անգլիական «Սթոկ Սիթիի» կազմում, որտեղ էլ և դարձել է ֆուտբոլի պատմության մեջ ամենահեռու տարածությունից խփված գոլի հեղինակը` 91.9 մետրից: Դա տեղի է ունեցել  2013 թվականի նոյեմբեր ամսին` «Սաութհեմպտոնի» դեմ խաղում:

Տպավորիչ է, այնպես չէ՞:
 Իսկ ի՞նչ կասեք 58.13 մետր հեռավորությունից գլխի հարվածով խփված գոլի մասին:
Այդպիսի ձեռքբերում է ունեցել «Օդդ Գրենլանդի» ֆուտբոլիստ Յոն Սամուելսոնը: Նա «Տրոմսեի» դեմ խաղում սեփական կիսադաշտից գլխի հարվածով գրավել է մրցակցի դարպասը:




ԴԱՐՊԱՍԱՊԱՀՆԵՐԻ ՌԵԿՈՐԴՆԵՐԸ

Ընդհանրապես դարպասապահները ավելի շատ պաշտպանում են իրենց թիմի դարպասը, քան փորձում գոլեր հեղինակել:

 Բայց բրազիլացի 42-ամյա դարպասապահ Ռոջերիո Սենիի մոտ գոլեր հեղինակելը ոչ պակաս լավ է ստացվում: Սենին տուգանային և 11մ հարվածներ իրացնելու իսկական վարպետ է: Այս տարվա հունիս ամսին նա խփեց իր կարիերայի 128-րդ գոլն. այդպիսով դառնալով ֆուտբոլի պատմության ամենաարդյունավետ դարպասապահը` խփած գոլերի քանակով: Սենին 2002 թվականին Բրազիլիայի հավաքականի կազմում հաղթել է ԱԱ-ն և իր ակումբի` «Սան Պաուլուի» պատմության մեջ  10 ռմբարկուների ցուցակում է:


Իսկ պարագվայցի Խոսե Լուիս Չիլավերտը հանդիսանում է միակ դարպասապահն, ով դարձել է հետ-տրիկի հեղինակ:  Դա տեղի է ունեցել 1999 թվականին, երբ արգենտինական «Վելես Սարսֆիլդի» կազմում երեք 11մ հարված է իրացրել «Ֆերրո Կարրիլ Օեստեի» դարպասը:



ՀԵՏ-ՏՐԻԿՆԵՐ

«Սաութհեմպտոնի»  ֆուտբոլիստ Սադիո Մանեն նախորդ մրցաշրջանում «Ասթոն Վիլլայի» դեմ խաղում դարձավ Պրեմիեր Լիգայի պատմության ամենաարագ հետ-տրիկի հեղինակը: Սենեգալցին դա արեց ընդամենը 2 րոպե 56 վարկյանում:

Իսկ ամբողջ անգլիական ֆուտբոլի պատմության ամենաարագ հետ-տրիկի հեղինակը «Ռոս Կաունտիի» նախկին ֆուտբլիստ Տոմի Ռոսն է, ով 1964 թվականին 3 գնդակ է  ուղարկել «Ներն Կաունտիի» դարպասն` ընդհամենը 90 վարկյանում:


ԾԵՐՈՒՆԻ ՌԵԿՈՐԴԱԿԻՐՆԵՐԸ

Կամերունցի ֆուտբոլիստ Ռոժե Միլլան հանդիսանում է ամենատարեց ֆուտբոլիստն, ով գոլի հեղինակ է դառնում ԱԱ-ն եզրափակիչ փուլում ( Կամերուն - Ռուսաստան  խաղի ժամանակ Ռոժեն եղել է 42 տարեկան):

Ճապոնացի Կադզույոսի Մուիրան «Ջեյ Լիգայի» երկրորդ դիվիզոնում «Յոկոգամի» կազմում գոլ է խփել 48 տարեկան հասակում: Նա հանդիսանում է ամենատարեց պրոֆեսիոնալ ֆուտբոլիստը:


Իսկ այս ցուցանիշով բացարձակ ռեկորդակիր է ուելսցի Բիլլի Մերեդիտն, ով Անգլիայի Գավաթի խաղարկության «Մանչեսթեր Սիթի» - «Բրայտոն» խաղում` «քաղաքայինների» կազմում դարձել է գոլի հեղինակ այդ պահին  լինելով 48 տարեկան և 208 օրական: Դա տեղի է ունեցել 1924 թվականին: Նա նաև հանդիսանում է ամենատարեց ֆուտբոլիստն, ով գոլի հեղինակ է դառնում միջազգային խաղերում  (45 տարեկան և 73 օրական): Դա տեղի է ունեցել 1919 թվականին Ուելս-Անգլիա հանդիպման ժամանակ:


ՀՐԱՇՔ ՈՒՈՄԲԱԽԸ


Ինչ վերաբերում է կանանց ֆուտբոլին, ապա Էբբի Ուոմբախն, ԱՄՆ-ի հավաքականի կազմում անցկացրած 252 խաղում դարձել է 184 գոլի հեղինակ:

Ուոմբախը հաղթել է 2015 թվականի կանանց ԱԱ-ը: Նա կանանց ֆուտբոլի պատմության մեջ միջազգային ասպարեզում ամենաշատ գոլեր հեղինակած ֆուտբոլիստուհին է:

Իսկ տղամարդկանց ֆուտբոլում նման ցուցանիշով ռեկորդակիր է համարվում իրանցի լեգենդար Ալի Դաեին: Մյունխենի «Բավարիայի» նախկին ֆուտբոլիստն Իրանի հավաքականի կազմում անցկացրած 148 խաղերում խփել է 109 գոլ:

ԻՆՔՆԱԳՈԼԵՐ

Բելգիայի հավաքականի նախկին պաշտպան Ստան վան դեն Բյոիսը հանդիսանում է ոչ այնքան հաճելի ռեկորդի հեղինակ: 1995 թվականին իր թիմը` «Ժերմինալ Էկերենը» պարտվեց «Անդերլեխտին» 3:2 հաշվով: Իսկ նա դարձավ 3 ինքնագոլի հեղինակ:

Իսկ մեկ խաղի ընթացքում կատարված ինքնագոլերի ռեկորդը պատկանում է մադագասկարյան «Ստադ Օլիմպիկ Լեմիրն» թիմին: 2002 թվականին «ԱՍ Ադեմայի» դեմ խաղում «Ստադի» ֆուտբոլիստները 149 անգամ գրավել են սեփական դարպասը: Այս արարքը բացատրվում է նրանով, որ «Ստադի» ֆուտբոլիստները դժգոհ էին մրցավարի որոշումներից:

Ջեյմի Վարդի: Սիրողական ֆուտբոլից մինչև Պրեմիեր Լիգայի ռեկորդակիր

Ջեյմի Վարդի` հարձակվող, հետաքրքիր և յուրօրինակ  անցյալով: Շատ չեն դեպքերը, երբ սիրողական մակարդակում կարիերան սկսած ֆուտբոլիստը կարողանում է հասնել մեծ հաջողությունների: Սակայն Վարդիի դեպքում հաջողություններ ասվածը մեղմ կլինի, քանզի անգլիացին այս պահի դրությամբ համարվում է Պրեմիեր Լիգայի այս մրցաշրջանի  լավագույն ռմբարկուն: Բացի այդ, Վարդին կրկնել է լեգենդար Ռուդ վան Նիստելռոյի արդյունավետության ռեկորդը:
 Իսկ հիմա այս ամենի մասին ավելի մանրամասն:


Անցած հանգստյան օրերին ֆուտբոլային աշխարհն այնքան էր տարվել «Էլ Կլասիկոյով», որ նույնիսկ շատերը չեն նկատել,  որ Պրեմիեր Լիգայի մրցաշարային աղյուսակի առաջին հորիզոնական է բարձրացել համեստ, բայց միևնույն ժամանակ հանդուգն  «Լեսթեր Սիթին»: Կլաուդիո Ռանիերիի թիմի ցուցադրած այսպիսի ֆենոմենալ արդյունքների առաջին «մեղավորը» հենց Ջեյմի Վարդին է:


Ջեյմի Վարդին ծնվել է 1987 թվականի հունվարի 11-ին Մեծ Բրիտանիայի  Շեֆիլդ քաղաքում: Ամբողջ մանկությունն   անցկացրել է Շեֆիլդի բանվորական թաղամասերի  բակերում, փողոցներում ֆուտբոլ խաղալով. ունենալով  երազանք` դառնալ մեծ ֆուտբոլիստ: Սակայն պրոֆեսիոնալ ֆուտբոլիստ դառնալու ճանապարհին. առաջին խոչընդոտին բախվեց հարազատ քաղաքի  «Շեֆիլդ Ուենսդեյ» ակումբի երիտասարդական թիմում հանդես գալու ժամանակ: Այդ ժամանակ թիմի մարզիչները  16-ամյա Վարդիին համարում էին անհեռանկարային ֆուտբոլիստ, քանի որ նրանց չէր գոհացնում անգլիացու ցածր  հասակը,  ֆիզիկական տվյալները   և կարգապահությունը: Այդ ամենի արդյունքում Վարդիին հեռացրեցին «Շեֆիլդ Ուենսդեյի» ակադեմիայից:

Ջեյմի Վարդին այդ տարիներին շատ էր տարված խրախճանքներով և նույնիսկ մի անգամ ակումբում ծեծկռտուքի պատճառով հայտնվել էր ոստիկանական բաժանմունքում: Դրա արդյունքում գրեթե մեկ տարի ստիպված էր կրել էլեկտրոնային ձեռնաշղթա, որի միջոցով ոստիկանությունը հետևելու էր նրա տեղաշարժին:

Այդ ընթացքում հասկանալով, որ ֆուտբոլիստ դառնալու իր երազանքը հեռանում է իրենից, Վարդին որոշում է հավաքվել և փորձում է ուժերը կենտրոնացնել անգլիական 8-րդ դիվիզիոնը  ներկայացնող  «Ստոկսբրիջ» ակումբում իր ելույթների վրա:  Բայց 4 տարի սիրողական մակարդակի ֆուտբոլն ու շաբաթական 30 ֆունտ աշխատավարձը ստիպեցին Վարդիին տեղափոխվել մեկ այլ ակումբ:
 Նոր ակումբը  «Հալիֆակս Թաունն» էր, որի սկաուտները նկատել էին Վարդիին 22 տարեկան հասակում: Այս ակումբը նույնպես պրոֆեսիոնալ մակարդակի չէր, բայց անկասկած սա քայլ էր դեպի առաջ, քանի որ, «Հալիֆակս Թաունը» հանդես էր գալիս Հյուսիսային Կոնֆերենցիայում` որը հանդիսանում է անգլիական ֆուտբոլի 6-րդ դիվիզիոնը:

Նոր ակումբում Ջեյմի Վարդին իրեն հիանալի դրսևորեց` առաջին իսկ մրցաշրջանում խփելով 27 գոլ: Հաջորդ մրցաշրջանի սկզբում տեղափոխվեց «Ֆլիտվուդ Թաուն», որը հանդես էր գալիս արդեն անգլիական ֆուտբոլի 5-րդ դիվիզիոնում:

«Ֆլիտվուդ Թաունում»  36 խաղում խփելով 31 գնդակ, ճանաչվեց առաջնության  լավագույն ռմբարկու, որի շնորհիվ էլ  թիմը վաստակեց ուղեգիր դեպի անգլիական ֆուտբոլի 4-րդ դիվիզիոն: Այդ ժամանակ «Բլեքպուլի» գլխավոր մարզիչ Յան Հոլովեյը, հիացած լինելով Վարդիի խաղով, որոշեց գնել նրա տրանսֆերը: Սակայն գումարի հարցում ակումբները չկարողացան համաձայնության գալ: Արդյունքում 2012 թվականին Ջեյմի Վարդին սիրողական ֆուտբոլի համար ռեկորդային  1 միլիոն ֆունտ գումարով, տեղափոխվեց Չեմպիոնշիպում հանդես եկող «Լեսթեր Սիթի»:


Ջեյմի Վարդիի պրոֆեսիոնալ ֆուտբոլիստ դառնալու ճանապարհը այս անգամ ևս տհաճ անակնկալ էր պատրաստել նրա համար: «Լեսթեր Սիթիում» առաջին տարում նրա ցուցադրած խաղը պարզապես հիասթափեցրեց թիմի երկրպագուներին: Ամբողջ մրցաշրջանի ընթացքում Վարդին դարձավ ընդամենը 5 գոլի հեղինակ: Նույնիսկ եղավ մի պահ, երբ 25-ամյա Վարդին ցանկանում էր հեռանալ ֆուտբոլից: Այդ հիմար գաղափարից նրան ետ պահեցին «Լեսթերի» գլխավոր մարզիչ Նայջլ Պիրսոնը և նրա օգնական Կրեյգ Շեքսպիրը:

Հետևելով «շեքսպիրյան» խորհուրդներին, Վարդին որոշում է վերջնականապես կենտրոնանալ ֆուտբոլի վրա, փորձելով ապացուցել երկրպագուներին և լրագրողներին, որ  դեռ ասելիք ունի մեծ ֆուտբոլում:
 Հաջորդ տարի «Լեսթեր Սիթին» հայտնվում է Պրեմիեր Լիգայում: Վարդին աստիճանաբար սկսում է վաստակել երկրպագուների սերն ու հարգանքը:
Հատկապես «Մանչեսթեր Յունայթեդի» դեմ հաղթական խաղում, երբ Վարդին մասնակցեց իր թիմի խփած գրեթե բոլոր գոլերին:
 Անկասկած Նայջլ Պիրսոնի խորհուրդներն օգնեցին Վարդիին կատարելագործվելու, բայց այն, ինչ հիմա անում է «Լեսթերի» նոր գլխավոր մարզիչ Կլաուդի Ռանիերին, արժանի է գովասանքի: Իտալացի մասնագետը թիմի խաղը կառուցում է այնպես, որ ամենագլխավոր գործող անձը լինի հենց Ջեյմի Վարդին: Ռանիերին Վարդիին բացարձակ ազատություն է տվել խաղադաշտում, որի շնորհիվ էլ անգլիացի հարձակվողը փայլում է այս մրցաշրջանում:

Ջեյմի Վարդին այս մրցաշրջանում անցկացրած 13 խաղից հետո իր ակտիվում ունի նույնքան խփած գնդակ: Իսկ ամենահետաքրքիրն այն է, որ վերջին 10 խաղում նա անընդմեջ դառնում է գոլի հեղինակ: Այս ցուցանիշով 28-ամյա անգլիացին կրկնեց «Մանչեսթեր Յունայթեդի» հոլանդացի հարձակվող Ռուդ վան Նիստելռոյի ռեկորդը, որը 2003 թվականին ևս 10 խաղ անընդմեջ դարձել էր գոլի հեղինակ:
Ճակատագրի հեգնանքով, Ջեյմի Վարդին կարող է բացարձակ  ռեկորդ սահմանել  արդեն հաջորդ խաղում որտեղ իր թիմը մրցելու է  «Մանչեսթեր Յունայթեդի» հետ:


Եվս մեկ հետաքրքիր փաստ Ջեյմի Վարդիի կյանքից: Այսպիսի փայլուն խաղ ցուցադրելով, նա կարողացավ գրավել Անգլիայի ազգային հավաքականի գլխավոր մարզիչ Ռոյ Հոջսոնի ուշադրությունը: Վարդին արդեն 4 հանդիպում անցկացրել է «երեք առյուծների» թիմում: Եվ  հասկանալով, որ այս տեմպերով շարունակելու դեպքում նա կարող է հայտնվել  հաջորդ տարի կայանալիք ԵՎՐՈ 2016-ի մասնակիցների թվում Վարդին հետաձգել է իր հարսանիքը, որը նախատեսված էր հենց 2016 թվականի ամռանը:

Ինչու՞ անգլիական ակումբները գնորդներ չունեն

Անգլիական ակումբների շատ երկրպագուներ երազում են, որ իրենց սիրելի ակումբը մի օր կգնի ինչ-որ միլիարդատեր: Բայց կարդալով այս նյութը դուք կհամոզվեք, որ այդ երազանքն այդքան էլ մոտ չէ իրականությանը:

Մարկ Գոլդբերգն ու Սայմոն Ջորդանը  կորցրեցին գրեթե 90 մլն ֆունտ «Կրիստալ Փելասը» ֆինանսավորելուց: Նմանատիպ կերպով, միլիարդատեր և մեքենաների համար  պլաստմասյա իրեր արտադրող ընկերության ղեկավար Շադիհ Կխանը  մեծ գումարներ կորցրեց անգլիական «Ֆուլհեմը» ֆինանսավորելուց:

 Վինսենտ Տան` միլիարդատեր, ով կուտակել է իր ունեցվածքի մեծ մասը Մալազիայում գործող «Մակդոնալդսի» շնորհիվ, ևս մեծ գումարներ կորցրեց գնելով «Քարդիֆ Սիթի» ակումբը: Իսկ   «Վենկիս» կազմակերպությունը կրկնեց  Վինսենտ  Տանի «հաջողությունները» «Բլեքբերն Ռովերսը» գնելով:
 «Բիրմինգեմ Սիթիի» սեփականատեր Կարսոն Յունգը, ով այս պահին գտնվում է անազատության մեջ` փողերի լվացման մեղադրանքով, տեսավ թե ինչպես  Դևիդ Գոլդին, Դևիդ Սալիվանին և Կարրեն Բրեյդիին( վերջիններս այս պահին հանդիսանում են անգլիական «Վեստ Հեմի» սեփականատերերը)  վճարած 83 մլն ֆունտը  3 տարի հետո արժեզրկվեց` հասնելով 30 մլն ֆունտի:




Այս պահին   վաճառքի են հանված 3 անգլիական ակումբներ` «էվերթոնը» 170 մլն ֆունտ, «Ասթոն Վիլլան» 180 մլն ֆունտ, «Վեստ Բրոմվիչը» 150 մլն ֆունտ ( գները նշված են մոտավորապես):
Կան 3 վաճառվող ակումբներ, իսկ գնորդներ չկան: Նույնիսկ 5.2 մլրդ ֆունտ  արժողությամբ հեռուստատեսային պայմանագրի առկայությամբ (որը հնարավորություն է տալու անգամ ցածր հորիզոնականներ զբաղեցնող թիմերին վաստակել ավելի քան 100 մլն ֆունտ) գնորդներ չկան:

Կարելի է ասել, որ ոչինչ այդպիսի մեծ քանակությամբ գումար չի «մսխում», ինչպես ֆուտբոլային ակումբը:
«Լիդս Յունայթեդը» չի տնօրինում իր մարզադաշտ  «Էլլանդ Ռոուդը» և իր մարզումային կենտրոն «Տորպ Արչը»: Սակայն այդ երկու տարածքների վարձակալության համար ամսեկան վճարում է 1 մլն ֆունտ:

               ՊՐԵՄԻԵՐ ԼԻԳԱՅԻ ԱՄԵՆԱՀԱՐՈՒՍՏ ՍԵՓԱԿԱՆԱՏԵՐԵՐԸ

                    Շեյխ Մանսուր` «Մանչեսթեր Սիթի», ունեցվածքը - 30 մլրդ 

                    Ռոման Աբրամովիչ` «Չելսի»,  ունեցվածքը 8 մլրդ

                   Սթեն Կրոնկե` «Արսենալ», ունեցվածքը - 7.6 մլրդ

                     Ջո Լևիս` «Տոտենհեմ Հոտսպուր», ունեցվածքը - 5.3 մլրդ 

                     Գլեյզերների ընտանիքը` «Մանչեսթեր Յունայթեդ», ունեցվածքը - 4.7 մլրդ 

2007 թվականին Սըր Ջեք Հեյվորդը վաճառեց «Վուլվերհեմպտոն» ակումբը 10 մլն ֆունտով Սթիվ Մորգանին, ով հանդիսանում էր «Ռեդրոու» տների սեփականատերը: Վերջինս նոր ակումբում ներդրեց 30 մլն ֆունտ: Կեն Բեյտսը 1982 թվականին 1 ֆունտով գնեց «Չելսին»` խոստանալով, որ կմարի ակումբի ամբողջ պարտքը, բայց ...

Վերջերս  քուվեյթցի  միլիարդատեր Ֆայազ Ալ Խասաֆին, ով իր ունեցվածքը կուտակել է օդորակիչների վաճառքից, գնեց անգլիական  «Նոթինգեմ Ֆորեստ» ակումբը նոմինալ 10 մլն  ֆունտ գումարով` երաշխավորելով, որ կմարի Նայջլ Դաութիի ֆոնդին ակումբի պարտքերը,  քանի որ նա ապահովագրել էր ակումբը նախկին սեփականատիրոջ  ողբերգական   մահից  հետո:

Նույնիսկ սերիալային դերասան Սըր Ալան Շուգարը, ով հանդես էր գալիս  «BBC» հեռուստաալիքով ցուցադրվող «Աշակերտ» սերիալում, 2001 թվականին վաճառեց «Տոտենհեմը» Ջո Լևիսին և Ֆանիել Լևիին 65 մլն ֆունտով: 

Ֆուտբոլային ակումբը ղեկավարելը բավականին անհուսալի  բիզնես է, որտեղ նույնիսկ հմուտ բիզնեսմենները կարող են խճճվել դրանք կառավարելուց: 

Եգիպտացի միլիարդատեր Մուհամեդ Ալ-Ֆաեդը, ում նախկինում պատկանում էին «Ֆուլհեմն» ու «Հերոդսը», հայտարարել էր, որ մեծ հանգստություն էր զգացել երբ վաճառել էր ֆուտբոլային ակումբը, ետ բերելով   իր ներդրածի միայն  75 %-ը: 

Մուլտիմիլիարդատեր Էդդի Դևիսը հույս ունի իրեն պատկանող «Բոլթոն» ֆուտբոլային ակումբի վաճառքից ստանալ 130 մլն ֆունտ, սակայն հաշվի առնելով, որ թիմը ընթանում է մրցաշարային աղյուսակի «նկուղում», ամենայն հավանականությամբ  կստանա իր պահանջածի մոտավորապես 20-30 %-ը: 

Համաշխարհային ճանաչում ունեցող իտալական «Պարմա» ակումբը, որը ժամանակին հաղթել է Իտալիայի առաջնությունն ու նույնիսկ ՈՒԵՖԱ-ի գավաթը, գնորդ չունենալու պատճառով ճանաչվել է սնանկ և հանդես է գալիս Իտալիայի  Սերիա C-ում, որը համարվում է սիրողական մակարդակի լիգա: 

Միլիարդատեր Ռենդի Լերները, ով հանդիսանում է անգլիական «Ասթոն Վիլլայի» սեփականատերն, ակումբի վրա  ներդրել է 300 մլն ֆունտ, իսկ հիմա չի կարողանում վաճառել 180 մլն ֆունտով: Նույնիսկ 1 մլրդ դոլար կարողություն ունեցող Լերների համար 120 միլիոնի կորուստը զգալի է: 

Հետաքրքիր է,  որ «92-ի դասարանի» լեգենդար անդամներ` Գիգզը, Նևիլ եղբայրները, Բաթն ու Սքոուլզը, կարողացել են գրավել սինգապուրցի միլիարդատեր Պիտեր Լիմի ուշադրությունը և նրա հետ միասին հանդիսանում են անգլիական «Սոլֆորդ Սիթի» ակումբի սեփականատեր` 50-50 հարաբերությամբ: 

Այն միտքը, որ հարուստ սեփականատերերը մեծ գումարներ են ներդրում իրենց ակումբներում արդեն արդիական չէ: 

Միակ անգլիական ակումբն, որը երազում են գնել շատ միլիարդատերեր` դա Լոնդոնի  «Արսենալն» է: Ալիշեր Ուսմանովն, ով հանդիսանում է «Արսենալի» բաժնետոմսերի 30 %-ի  սեփականատերը, ցանկանում է ձեռք բերել ակցիաների 50 + 1 %-ը:  Սակայն այս պահին 69 %-ով գլխավոր բաժնետեր է հանդիսանում Սթեն  Կրոնկեն: Բայց ցեմենտի մագնատ, նիգերիացի միլիարդատեր Ալիկո Դանգոտեն ունենալով 15 մլրդ կարողություն ևս ցանկանում է գնել Կրոնկեին պատկանող բաժնեմասը: Լոնդոնում գտնվող մարզաբազան և 240 մլն ֆունտ եկամտաբերությամբ «էմիրեյթս» մարզադաշտը «համեղ պատառ» է հանդիսանում: 

Վաճառքի հանված 3 անգլիական ակումբներ ` «Էվերթոն», «Ասթոն Վիլլա», «Վեստ Բրոմվիչ», սպասում են իրենց պոտենցիալ միլիարդատեր գնորդներին, քանի որ, պարզապես հարուստ լինելով գնել այս ակումբներից մեկը կարող ես հեշտությամբ կորցնել քո ամբողջ ունեցվածքն, այն ներդնելով միայն ակումբի մեջ: 

Հետագայում ֆուտբոլային ակումբը ղեկավարելը  կդառնա նույնպիսի զվարճալի. ինչպիսին հիմա ֆուտբոլն է` բազմաթիվ երկրպագուների համար: 

Այնպիսի մարդիկ ինչպիսին «Մանչեսթեր Սիթիի» սեփականատեր Շեյխ Մանսուրն է, այդքան էլ  շատ չեն: 

Այնպես որ

ՄԱՐԶԻՉՆԵՐ ՈՎՔԵՐ ԵՐԲԵՔ ՊՐՈՖԵՍԻՈՆԱԼ ՖՈՒՏԲՈԼ ՉԵՆ ԽԱՂԱՑԵԼ

Վերջին ժամանակներս բազմիցս հնչում է  այն թյուր կարծիքը, թե լավ մարզիչ դառնալու համար, պարտադիր պայման է նախկին ֆուտբոլիստ լինելը: Այսպիսի կարծիք են հայտնել  շատ ֆուտբալին մասնագետներ, քննադատներ և նույնիսկ մարզիչներ:





 Գիտեք, իմ կարծիքով  այս խոսքերը չեն կարող և ոչ մի ադեկվատ բացատրություն ունենալ, քանզի...


Ինչպես դառնալ ֆուտբոլային մարզիչ:

Մարզչական Բ արտոնագիրը ՀՖՖ մարզչական որակավորման առաջին աստիճանն է, որը իրավունք է տալիս մարզչական գործունեություն ծավալելու ՀՀ, ինչպես նաև ՈՒԵՖԱ-ի անդամ այն երկրներում, որոնք ստորագրել են ՈՒԵՖԱ-ի մարզչական կոնվենցիան:

Դասընթացին կարող են մասնակցել 21 տարին լրացած բոլոր այն անձինք, ովքեր ցանկանում են ստանալ ֆուտբոլի մարզչի նախնական կրթություն և մարզչական գործունեություն ծավալել:


Այսինքն յուրաքանչյուր ոք, կարող է սկսել իր մարզչական ճանապարհն այս կերպ և հնարավորություն ունենալ հասնելու մեծ հաջողությունների համաշխարհային ֆուտբոլում:

Միանշանակ մարզչի լավ կամ վատ լինելը որոշվում է նրա գաղափարներվ և կառուցած խաղով: Արդյուքներով համեմատել այս մարզչին մյուսի հետ սխալ կլինի , քանի որ հանգամանքների բերումով հնարավոր է բավականին բարձր մակարդակի մազիչ հայտնված լինի միջին մակարդակի թիմում և հասկանալի է որ տվյալ պարագայում նա չի կարող դառնալ ասենք Չեմպիոնների Լիգայի հաղթող:
Առաջին հերթին պետք է ունենալ առաջնորդին հատուկ որակներ: Թիմի մարզիչը պետք է կարողանա ղեկավարել իր ենթակայության տակ գտնվող ֆուտբոլիստներին:

Հաջողակ մարզիչ դառնալու համար պետք է առաջին հերջին ունենալ առաջնորդին հատուկ որակներ: Ցանկացած թիմի բաղկացած է գրեթե 25 ֆուտբոլիստներից և մարզիչը պետք է կարողանա ղեկավարել նրանց: Շատ կարևոր է նաև հոգեբանորեն չիշտ մոտեցում ցուցաբերել ֆուտբոլիստներին: Ընդհանրապես ֆուտբոլը դա մրցակցություն է: Երկու թիմերի մարզիչներ փորձում են միմյանց դեմ պայքարել յուրահատուկ մեթոդներով:

Զարմանալի չէ այն փաստը որ մի ֆուտբոլիստ այս մարզչի մոտ ցուադրում է իր հնարավորությունների կեսը, իսկ մյուսի մոտ օգտագործում է իր ողջ պոտենցիալը: Դա առաջին հերթին գալիս է մարզչի չիշտ մոտեցումից:
 Անկասկած նախկինում ֆուտբոլիստ լինեը կարող է օգտակար լինել ապագա մարզիչ դառնալու գործում: Բայց միայն տեսականորեն: Շատ են դեպքերը համաշխարհային ֆուտբոլում, երբ նախկինում ֆուտբոլիստ չլինենոլ դառնում են թոփ մակարդակի մասնագետներ:

ՄԱՐԶԻՉՆԵՐ ՈՎՔԵՐ ԵՐԲԵՔ ՊՐՈՖԵՍԻՈՆԱԼ ՖՈՒՏԲՈԼ ՉԵՆ ԽԱՂԱՑԵԼ
* Արիգո Սակի- 2 անգամ հաղթել է Եվրոպայի Չեմպիոնների գավաթը, 2 անգամ ՈՒԵՖԱ-ի սուպերգավաթը, 1 անգամ Իտալիայի առաջնությունն ու սուպերգավաթը

* Ժոզե Մոուրինյո - 2 անգամ հաղթել է Չեմպիոնների Լիգայն, 3 անգամ Անգլիայի Պրեմիեր Լիգան, 2 անգամ Իտալիա Սերիա Ա-ն, 1 անգամ Իսպանիայի Լա Լիգան:

* Անդրե Վիլաշ-Բոաշ - Հաղթել է Պորտուգալիայի առաջնությունը, գավաթը, սուպերգավաթը, Ռուսաստանի առաջնությունն ու Սուպերգավաթը և Եվրոպա Լիգայի գավաթը:


Այս ցուցակի մեջ կարող են ք  ավելացնել նաև Ավրաամ Գրանտին, Կառլուշ Կեյրուշին, Լեո Բենհակերին:

Բայց մարզիչների մասին եզրակացություն կազմել միայն նրանց վատսկած տիտղոսներով սխալ կլինի: Օրինակ Արսեն Վենգերը գրեթե 8 տարի ոչ մի տիտղոս չնվաճեց Արսենալի հետ: Բայց հիմա չկա մի մարդ ով կարող է ասել որ ֆրանսիացի մասնագետը վատն է կամ նրա կատարած աշխատանքը անարդյունավետ է:

«Արսենալ» - «Բավարիա». Երբ խոսում է իրականությունը

Հետևելով «Բավարիա» - «Արսենալ» հանդիպմանը, վստահաբար կարելի է նշել, որ Արսեն Վենգերի թիմն այս խաղը պարտվեց, քանի որ խաղամակարդակով և կազմակերպվածությամբ  զիջում  էր մրցակցին:
 Հենց սա է անգլիական ակումբների եվրագավաթային խաղերում ձախողվելու պատճառներից մեկը: Եվ եթե խաղամակարդակով ցածր լինելով, ինչ-որ տեղ հնարավոր է լավ արդյունքի հասնել, ապա անկազմակերպ լինելով թիմը  դատապարտվում է ձախողման:
 Վերադառնանք  «Բավարիա» - «Արսենալ» հանդիպմանը:
Մյունխենյան ակումբի խաղն իրոք բավականություն է պատճառում: Բայց չէ որ ամեն ինչի դեմ կա հակախաղ: Այս դեպքում ևս,  «Արսենալը» չնայած այդպիսի մեծ կորուստների,(Ռեմսի, Բելերին, Ուիլշեր, Ուոլքոտ, Ուելբեք,Օքսլեյդ-Չեմբեռլեն, Արտետա, Ռոսիցկի) կարող էր գոնե փորձել կանգնեցնել գերմանական ուժով և իսպանական խելքով կառավարվող թիմին:


ՊԱՇՏՊԱՆՈՒԹՅԱՆ ԱՋ ԵԶՐԸ

 Հեկտոր Բելերինի բացակայությամբ տուժեց   «Արսենալի» և՛ հարձակումը, և՛ պաշտպանությունը: Մատյե Դեբյուշին, ով այս խաղում դուրս էր եկել մեկնարկային րոպեներից, անկասկած չարդարացրեց Վենգերի սպասելիքները: «Բավարիայի» ֆուտբոլիստներ Կինգսլի Կոմանն ու Դուգլաս Կոստան միմյանց հերթ չտալով տանջեցին ֆրանսիացի եզրային պաշտպանին: Մեծ է հավանականություն, որ Բելերինի ներկայությամբ, Արսենալի պաշտպանական գծի աջ եզրն ավելի արդյունավետ կլիներ:

ԿԻՍԱՊԱՇՏՊԱՆՈՒԹՅԱՆ ԿԵՆՏՐՈՆԸ

Սարսափելի վատ հանդիպում անցկացրեց Սանտի Կասորլան: Սակայն իմ կարծիքով իսպանացու այսպիսի վատ խաղի մեղավորը թիմի գլխավոր մարզիչ Արսեն Վենգերն է: Վերջինս անհասկանալիորեն չցանկացավ այս ամառային տրանսֆերային պատուհանի ընթացքում համալրել թիմի կիսապաշտպանական գիծը` անտեսելով նույնիսկ այն հանգամանքն, որ գրեթե ամբողջ ֆուտբոլային հասարակությունը` հատկապես փորձագետները նշում էին, որ «Արսենալն» այդ դիրքում ուժեղացման կարիք ունի:
Սանտի Կասորլան արդեն 30 տարեկան  և բնական է, որ նա կարող է պարզապես հոգնել: Հենց այդ պատճառով էլ նրան ժամանակ առ ժամանակ դադար է հարկավոր: Բայց այս պահին, եթե Կասորլան էլ բացակայի թիմի մեկնարկային կազմից. դա կարող է անդառնալի հետևանքներ ունենալ «Արսենալի» համար:


ՕԼԻՎՅԵ ԺԻՐՈՒ

Զագրեբի «Դինամոյի» հետ խաղում կարմիր քարտ ստանալուց հետո Ժիրուն վերջնականապես կորցրեց իր տեղը թիմի մեկնարկային կազմում: Սակայն Թեո Ուոլքոտի բացակայությամբ, Վենգերն ուղղակի այլ որոշում կայացնելու հնարավորություն չուներ, այդ պատճառով էլ իր հայրենակցին դուրս բերեց խաղադաշտ հենց խաղի սկզբից: Եվ առանց չափազանցնելու, կարելի է ասել, որ նա միակ ֆուտբոլիստն էր , ով ամբողջ հանդիպման ընթացքում իսկապես գտնվում էր խաղի մեջ:

«Մանչեսթեր Յունայթեդ». Անարդյունավետ հարձակումից մինչև գերարդյունավետ պաշտպանություն:

Վերջին շրջանում «Մանչեսթեր Յունայթեդի» հարձակման գծի արդյունավետությունը  մեղմ ասած զարմացնում է: Թիմը վերջին 5 խաղից երեքում չի կարողացել գոլ խփել:
Բայց հետաքրքիրն այն է, որ թիմն  արդեն 5 խաղ է գոլ բաց չի թողնում:
 Ծանոթանանք մի քանի վիճակագրական տվյալների հետ և քննարկենք դրանք:

ՎԻՃԱԿԱԳՐՈՒԹՅՈՒՆ

*Անցկացրած 11 խաղերից հետո ( չհաշված  «Վեստ Բրոմի» դեմ հաղթական խաղը)  ոչ մի թիմ չի ստեղծել ավելի քիչ գոլային պահ` քան «Մանչեսթեր Յունայթեդը»:

*Միայն «Սթոկ Սիթին» է ավելի քիչ հարված կատարել դարպասին` քան «Մանչեսթեր Յունայթեդը»: «Կարմիր սատանաների» մոտ այդ ցուցանիշը 110 է:

* «Մանչեսթեր Յունայթեդի» հեղինակած  17 գոլերից ընդամենը 1-ն է, որ խփվել է տուգանային հրապարակի մատույցներից դուրս` այն էլ այս վերջին տուրի «Վեստ Բրոմի» դեմ խաղում: Դրանից առաջ տուգանային հրապարակից դուրս կատարված հարվածով գոլի հեղինակ էր դարձել Խուան Մատան (նախորդ տարվա դեկտեմբեր ամսին):

* «Մանչեսթեր Յունայթեդը» Պրեմիեր Լիգայում արդեն 555 րոպե անառիկ է պահում սեփական դարպասը:

ԼՈՒԻ ՎԱՆ ԳԱԱԼԸ ԵՎ ՀԱՐՁԱԿՎՈՂՆԵՐԸ

Չնայած այն հանգամանքին, որ Լուի վան Գաալը իր մարզչական կարիերայում շահել է գրեթե բոլոր հնարավոր տիտղոսները, միևնույն է վստահաբար կարելի է ասել, որ շատ դեպքերում նրա խաղային ոճը չի համապատասխանել իր  ենթակայության տակ գտնվող ֆուտբոլիստների ոճին:

 Ռիվալդո, Դի Մարիա, Ռոբին Վան Պերսի. նրանք այն   ֆուտբոլիստներն են, ովքեր մեկ անգամ չէ, որ բողոքել են հոլանդացի մասնագետի մեթոդներից` պատճառաբանելով, որ դրանք վատ են անդրադառնում հարձակողական ֆուտբոլիստների վրա:
Լուի վան Գաալը կենտրոնացած է միայն գնդակին տիրելու վրա և հենց դա է պատճառը, որ «Մանչեսթեր Յունայթեդը» կատարած փոխանցումների քանակով երկրորդն տեղն է զբաղեցնում Պրեմիեր Լիգայում: Սակայն այս հանգամանքը հարձակման գծի արդյունավետության բարելավմանն այդքան էլ չի նպաստում: Իսկ դա բացատրվում է նրանով, որ այդ փոխանցումների մեծ մասը կատարվում է անիմաստ` քանի որ դա չի օգնում թիմին վտանգավոր պահեր ստեղծել մրցակցի դարպասի մոտ: 

Ընդորում ստեղծած պահերի 25.9 % եղել են եզրերում, ինչը զարմանալի չէ հաշվի առնելով, որ վերջին շրջանում նոմինալ հարձակվող Անտոնի Մարսիալը խաղում է ձախ եզրում, իսկ ենթահարձակվող Խուան Մատան աջ եզրում:

Բացի այդ կա ևս մի հետաքրքիր վիճակագրական տվյալ. Լուի վան Գաալի ղեկավարության օրոք Պրեմիեր Լիգայի ոչ մի թիմ չի կատարել ավելի շատ օդային փոխանցումներ դեպի տուգանային հրապարակ` քան «Մանչեսթեր Յունայթեդը»: Իսկ այս մրցաշրջանում խփած 17 գոլից ընդամենը մեկն է եղել գլխի հարվածով: 

«Չելսի» - «Լիվերպուլ» խաղին հետևելով կարելի էր նկատել թե ինչպե՞ս էր Յուրգեն Կլոպը իր բարձրահասակ և ամրակազմ հարձակվող Քրիստիան Բենտեկեին օգտագործում որպես «Target man» (հարձակվող, որի ուղղությամբ հետևում են թիմի բոլոր օդային փոխանցումները): Լուի վան Գաալի համար նույնն իրագործելը գրեթե անհնարին է, քանի որ վերջինս իր տրամադրության տակ չունի այդպիսի տակտիկային համապատասխան հարձակվող:

                                                       

Իսկ ինչպիսի՞ խաղ են ցուցադրում ֆուտբոլիստները հարձակման գծում: Ուեյն Ռունին Պրեմիեր Լիգայի այս մրցաշրջանում անցկացրած 11 խաղում դարձել է 2 գոլի հեղինակ: Դա նշանակում է, որ նա իր լավագույն մարզավիճակում չէ:
 Ընդհանրապես Լուի վան Գաալի տրամադրության տակ գտնվող հարձակվողները այնքան էլ համոզիչ խաղ չեն ցուցադրել:

Ուեյն Ռունի - 52 խաղ` 20 գոլ 

Ռոբին վան Պերսի - 29 խաղ` 10 գոլ

Ռադամել Ֆալկաո - 29 խաղ` 4 գոլ

Ջեյմս Ուիլսոն - 19 խաղ` 2 գոլ

Անտոնի Մարսիալ - 11 խաղ` 5 գոլ

Չիչարիտո - 3 խաղ` 0 գոլ 

Արդարության համար պետք է նշել, որ այս ցուցակում տեղ գտած ֆուտբոլիստներից երևի թե միայն Չիչարիտոն բավարար խաղաժամանակ չի ստացել: Իսկ դա նշանակում է, որ ֆուտբոլիստներն իրենց չեն արդարացրել:



ԼՈՒԻ ՎԱՆ ԳԱԱԼԸ ԵՎ ՊԱՇՏՊԱՆՆԵՐԸ

Ինչպես նշեցի «մանկունիացիների» հարձակման գծի արդյունավետությունը բավականին ցածր է, բայց դրա հետ մեկտեղ թիմը լավ է հանդես գալիս պաշտպանությունում: Կարծում է սա ավելի կարևոր է, քանզի Լուի վան Գաալի ղեկավարության ընթացքում «Մանչեսթեր Յունայթեդի» պաշտպանությունը խայտառակ խաղ էր ցուցադրում: Այս մրցաշրջանից սկսած պաշպանական գծի ֆուտբոլիստների խաղն անճանաչելիորեն փոխվել է: Ու եթե նախորդ մրցաշրջանում  թիմի «փրկիչը» հանդիսանում էր Դավիդ Դե Խեան, ապա այս տարի բացի նրանից հիանալի են հանդես գալիս նաև  պաշտպանները:

Լուի վան Գաալը պաշտպանական գծի ցանկացած դիրքում ունի 2 ֆուտբոլիստի թեկնածություն` չհաշված երիտասարդներին:
Երբ Լյուկ Շոուն գերազանց սկսած մրցաշրջանի սկզբնամասից հետո ծանր վնասվածք ստացավ, շատ փորձագետներ կանխատեսեցին, որ «Մանչեսթեր Յունայթեդի» պաշտպանությունը լուրջ խնդիրներ կունենա, բայց ....

                             

 Վերջին շրջանում Մարկոս Ռոխոյի լավ  խաղը պաշտպանության ձախ եզրում ուղղակի   հիացնում է: «Մանչեսթեր Սիթիի» և «Կրիստալ Փելասի» դեմ խաղերում, «կարմիր սատանաների» պաշտպանության ձախ եզրը  Ռոխոյի շնորհիվ պարզապես անանցանելի էր:

Մարկոս Ռոխոն Պրեմիեր Լիգայում միջինը մեկ խաղում կատարում է 4.3 գնդակի խլում:  «Մանչեսթեր Յունայթեդի» ֆուտբոլիստների մեջ` դա ամենալավ ցուցանիշն է:

ԼՈՒԻ ՎԱՆ ԳԱԱԼԸ ԵՎ ԵՐԻՏԱՍԱՐԴՆԵՐԸ

Հոլանդացի մասնագետի գլխավոր առավելություններից մեկը` դա երիտասարդների հետ աշխատելու ունակությունն է: Իսկ ավելի կոնկրետ, նա կարողանում է տաղանդներ հայտնաբերել: Վառ օրինակ է Թոմաս Մյուլլերը: Երբ Լուի վան Գաալը ղեկավարում էր Մյունխենի  «Բավարիան», Մյուլլերը դեռևս համարվում էր երիտասարդ և հեռանկարային ֆուտբոլիստ: Եվ շնորհիվ հոլանդացի մասնագետի համառության և իհարկե Մյուլլերի աշխատասիրության, վերջինս արդեն իսկ համարվում է աշխարհի լավագույն ֆուտբոլիստներից մեկը:
 «Մանչեսթեր Յունայթեդում» աշխատելու ընթացքում Լուի վան Գաալն իրենց դրսևորելու հնարավորություն է տվել այնպիսի երիատասարդ ֆուտբոլիստների ինչպիսիք են` Թեյլոր Բլեքետը, Պադի Մակնեյրը, Անդրեաս Պերեյրան և իհարկե Ջեսսի Լինգարդը:

ՋԵՍՍԻ ԼԻՆԳԱՐԴ

                                         

Լինգարդը դեռևս պատանեկան տարիքից եղել է «Մանչեսթեր Յունայթեդի» համակարգում: Վերջին տարիներին տարբեր ակումբներում վարձավճարով հանդես գալուց հետո վերադարձել է առաջին թիմ և հիմա Լուի վան Գաալի կողմից ստացել է հնարավորություն` իրեն լավագույնս դրսևորելու համար:
 «Մանչեսթեր Յունայթեդի» անցկացրած վերջին 7 խաղերում Լինգարդը խաղաժամանակ է ստացել: Իսկ վերջին երկու խաղերում` «ԲԿՄԱ»-ի և «Վեստ Բրոմի» դեմ դուրս է եկել մեկնարկային կազմում և աչքի է ընկել գոլով և գոլային փոխանցումով: Եթե Լինգարդը շարունակի այս տեմպերով, ապա  անկասկած նրան մեծ ապագա է սպասվում:

ԱՄՓՈՓՈՒՄ

Լուի վան Գաալն իր բոլոր բացասական և դրական կողմերով, փաստացի ապահովում է արդյունք թիմի համար: Եվ ինչքան էլ, որ քննադատեն նրան, միևնույնն է հոլանդացին գտնվում է ճիշտ ճանապարհի վրա, ինչի մասին վկայում են «Մանչեսթեր Յունայթեդի» զբաղեցրած բարձր հորիզոնականները Պրեմիեր Լիգայում և Չեմպիոնների Լիգայում:

ԵՎՐՈ 2016 Անցումային խաղեր: Հետաքրքիր փաստեր

Նոյեմբերի 12-ից 17-ը ներառյալ կկայանան Եվրոպայի 2016 թվականի առաջնության անցումային խաղերը: 

ՀԵՏԱՔՐՔԻՐ ՓԱՍՏԵՐ

Շվեդիայի և Հունգարիայի հավաքականների համար այս անցումային խաղերը կլինեն դեբյուտային:

Եվրոպայի առաջնությունների անցումային խաղերի պատմության մեջ ընդհանուր առմամբ մասնակցել է 20 հավաքական, որից 8-ը երբևէ չեն պարտվել, իսկ 6-ը չեն զգացել հաղթանակի բերկրանքը:

Հոլանդիայի և Խորվաթիայի հավաքականներն երկուական անգամ մասնակցել են ացնումային խաղերի և երկու դեպքերում էլ հասել են հաղթանակի: Իսկ Շոտլանդիայի հավաքականը երկու անգամ մասնակցել է անցումային խաղերին և երկու անգամ էլ պարտվել` ընդանուր դիմակայությունում:

Սլովենիան (2000թ)   և Լատվիան (2004թ) իրենց նորմաուտն են նշել Եվրոպայի առաջնության եզրափակիչ փուլում ` անցումային խաղերում հաղթելու շնորհիվ: Ընդորում, այդ ժամանակ ևս Սլովենիայի մրցակիցը եղել է Ուկրաինայի հավաքականը: 

Ռուդ վան Նիստելռոյը պատմության մեջ միակ ֆուտբոլիստն է, ով անցումային խաղերում հետ-տրիկ է ձևակերպել (Շոտլանդիայի դեմ պատասխան խաղում` 6:0):

Ռոբի Քինն ու Յոն- Դալ Թոմասոնն ևս իրենց ակտիվում ունեն 3-ական խփած գնդակ Եվրոպայի առաջնությունների անցումային խաղերում:


Միանգամից 4 անցումային խաղ անցկացրել են` Միլենկո Աչիմովիչ (Սլովենիա), Մլադեն Դաբանովիչ (Սլովենիա), Դամյեն Դաֆֆ (Իռլանդիա), Բարի Ֆերգյուսոն (Շոտլանդիա), Ամիր Կարիչ (Սլովենիա), Միրան Պավլին (Սլովենիա), Ստիպե Պլետիկոսա (Խորվաթիա), Դարիո Սռնա (Խորվաթիա), Զլատկո Զախովիչ (Սլովենիա): 

Ուկրաինայի (2000թ), Բոսնիայի և Հերցեգովինայի (2012թ), Էստոնիայի (2012թ), Չեռնոգորիայի (2012թ) հավաքականները չկարողացան առաջին անգամ դուրս գալ Եվրոպայի առաջնության եզրափակիչ փուլ` զիջելով անցումային խաղերում: 

Ընդամենը երեք հավաքականների է հաջողվել հաղթանակ տանել միանգամից երկու անցումային խաղերում: Դրանք են` Դանիան (2000թ - Իսրայելի դեմ), Իսպանիան (2004թ - Նորվեգիայի դեմ), և Չեխիան (2012թ - Չեռնոգորիայի դեմ): 

Չեմպիոնների Լիգայի այս մրցաշրջանի մասնակից 16 ակումբներից ընդհանուր առմամբ 32 ֆուտբոլիստ կօգնեն իրենց հավաքականներին Եվրո 2016-ի անցումային խաղերում:
 Ծանոթանանք ամբողջական ցուցակին:

«ԱՍՏԱՆԱ» - Բրանկո Իլիչ (Սլովենիա)

«ԱՏԼԵՏԻԿՈ» - Յան Օբլակ  (Սլովենիա)

«ԲԱՅԵՐ» - Կևին Կամպլ  (Սլովենիա)

«ԲՈՐՈՒՍԻԱ Մ» - Անդրեաս Քրիստենսեն (Դանիա), Հովարդ Նորդվեյթ (Նորվեգիա)

«ՎՈԼՍԲՈՒՐԳ» - Նիկլաս Բենդտներ  (Դանիա)

«ԳԵՆՏ» - Էրիկ Յոհանսոն  (Շվեդիա)

«ԴԻՆԱՄՈ (ԶԱԳՐԵԲ)» - Արմին Խոջիչ (Բոսնիա և Հերցեգովինա)

«ԴԻՆԱՄՈ (ԿԻԵՎ)» - Եվգենի Խաչերիդի, Օլեգ Գուսև, Անդրեյ Յարմոլենկո, Սերգեյ Սիդորչուկ, Դենիս Գարմաշ, Սերգեյ Ռիբալկա, Արտեմ Կրավեց ( բոլորն էլ`  Ուկրաինա)

«ՄԱԼՄՅՈ» - Իո-Ինգե Բերգետ (Նորվեգիա), Օսկար Լևիցկի (Շվեդիա)

«ՕԼԻՄՊԻԱԿՈՍ» - Օմար Էլաբդելլաուի (Նորվեգիա), Ջիմի Դուրմազ (Շվեդիա)

«ՊՍԺ» - Զլատան Իբրահիմովիչ (Շվեդիա)

«ՌԵԱԼ» - Մարտին Էդեգոր (Նորվեգիա)

«ՌՈՄԱ» - Միրալեմ Պյանիչ, Էդին Ջեկո (երկուսն էլ`  Բոսնիա և Հերցեգովինա)

«ՍԵՎԻԼԻԱ» - Միկաել Կրոն-Դելի  (Դանիա), Եվգենի Կոնոպլյանկա (Ուկրաինա)

«ՉԵԼՍԻ» - Ասմիր Բեգովիչ (Բոսնիա և Հերցեգովինա)

«ՇԱԽՏՅՈՐ (ԴՈՆԵՑԿ)» - Անդրեյ Պյատով, Վյաչեսլավ Շևչուկ, Ալեքսանդր Կուչեր, Յարոսլավ Ռակիցկի, Տարաս Ստեպանենկո, Ալեքսանդր Գլադկի (բոլորն էլ` Ուկրաինա) 

   

Անցումային խաղերի մասնակից 8 հավաքականներից միայն Իռլանդիան և Հունգարիան ներկայացուցիչ չունեն ՉԼ-ի այս մրցաշրջանում:  

Մտորումներ Բրենդան Ռոջերսի հեռացման վերաբերյալ

Մինչև այս վերջին  մերսիսայդյան դերբին համացանցում հայտվեցին լուրեր, ըստ որի անկախ դերբիում «Լիվերպուլի» գրանցած արդյունքից` Բրենդան Ռոջերսը կհեռացվի «Լիվերպուլից»: Այդպես էլ եղավ: Խաղի ավարտից հետո 1 ժամ անց «Լիվերպուլը» պաշտոնապես հայտարարեց, որ թիմի գլխավոր մարզիչ Բրենդան Ռոջերսը ազատվել է իր զբաղեցրած պաշտոնից:

                                 ՆԿԱՐ  1

 Փորձենք քննարկել մի քանի հանգամանք, որոնք կարող էին հիմք հանդիսանալ այս որոշումը կայացնելու հարցում:

Խնդիրներ  միջին մակարդակի թիմերի հետ

 Ռոջերսի «Լիվերպուլը» հաճախակի խնդիրներ էր ունենում իրենից կարգով ցածր թիմերի դեմ խաղերում:  « «Լիվերպուլին» հաղթելու գաղտնիքը` բաց թողած գոլերի բացակայությունն է»: Այս խոսքերն ոչ թե քննադատող փորձագետի կամ լրագրողի մտքեր են, այլ Մաուրիսիո Պոչետինոյի հետխաղյա մեկնաբանությունը` 2013 թվականին «Էնֆիլդում» «Լիվերպուլին» 0:1 հաշվով հաղթելուց հետո: Բարձր պրեսինգ, կազմակերպված խաղ պաշտպանությունում և մաքսիմալ արդյունավետ իրացրած գոլային պահեր: Սրանք են այն կարևոր նախադրյալները, որոնք օգնեցին «Սաութհեմպտոնին» ( հետո էլ արդեն մի շարք միջակ ակումբներին) հաղթելու «Լիվերպուլին»:

Հասկանալի է, որ վատ արդյունքների շարանը ստիպում է երկրպագուներին ավելի պահանջկոտ լինել և բնականաբար «Էնֆիլդում» տիրող այդ խելահեղ մթնոլորտը շատ ժամանակ ճնշում է ոչ թե մրցակցին` այլ հենց «Լիվերպուլի» ֆուտբոլիստներին:

«Լիվերպուլը» գրեթե միշտ  գոլ է բաց թողնում և ...

 2015 թվականին «Լիվերպուլը» շատ հաճախ գոլ է բաց թողնում մրցակցի կատարած առաջին հարվածից: Օրինակ` «Մանչեսթեր Յունայթեդի» դեմ խաղում, «մանկունյացիների» կատարած առաջին 3 հարվածներն ավարտվել էին գոլով:
«Նորվիչի» և «Սիոնի» դեմ խաղերում նույն իրավիճակն էր: «Լիվերպուլի» դարպասին հետևած վերջին 14 հարվածներից` 8-ն ավարտվել են գոլով:
 «Ասթոն Վիլլայի» դեմ խաղում, որը տեղի ունեցավ այս մրցաշրջանի նախորդ  տուրում, թիմը կարողացավ 1 խաղում 3 գոլ խփել: Այսպիսի դեպք վերջին անգամ եղել էր այս տարվա փետրվար ամսին: Վերջին անգամ 1 խաղում «Լիվերպուլը»  2 գոլ  խփել էր այս տարվա մայիս ամսին: Իսկ թիմի ֆուտբոլիստներից վերջին անգամ դուբլ գրանցել էին այս տարվա հունվար ամսին: Այս օրացուցային տարում` «Լիվերպուլում» խաղացել է միանգամից 7 տարբեր հարձակվող: Այսպիսի հանգամանքը բնականաբար պետք է ազդեր թիմի ցուցադրած արդյունքների վրա: Վերջին 18 խաղում «Լիվերպուլը» ընդամենը 2 անգամ է 1 խաղի ընթացքում խփել 2 կամ ավելի գնդակ:
 Վերջին 7 խաղերից 6-ում,  որոնց ընթացքում թիմը գոլ է խփել` չի կարողացել պահպանել  իր  առավելությունը: «Բորդոյի» հետ խաղում «Լիվերպուլը» ընդամենը 16 րոպե է կարողացել պահպանել առավելությունը, իսկ «Էվերթոնի» հետ խաղում ` 4 րոպե:

Պաշտպանությունում տիրող սխալները:
 Բրենդան Ռոջերսի  օրոք «Լիվերպուլի» պաշտպանությունը մեղմ ասած չի փայլում լավ վիճակագրությամբ: 115 գոլ և գոլային իրական պահ է ստեղծվել մրցակցի կողմից «Լիվերպուլի» դարպասին: Իսկ Դեյան Լովրենի մասին խոսելն անգամ ավելորդ է:

Լիդերի բացակայությունը թիմում:
 Ջեյմի Կարագերը, Ստիվեն Ջերարդը և  Լուիս Սուարեսն եղել են թիմի իսկական լիդերները, որոնք խաղադաշտում իրենց ետևից առաջ են տարել թիմին: Իսկ այսօրվա դրությամբ «Լիվերպուլում» չկա մեկը, ով համարձակություն  կունենա իր վրա վերցնել այդ պարտականությունը:

Ջերարդի փոխարինողը որպես ավագ:
 Իհարկե Ջորդան Հենդերսոնը ամենալավ թեկնածուն էր Ջերարդից հետո: Քանի որ, առաջին հերթին նա անգլիացի է, երկորդ` նա երիտասարդ, բայց միևնույն ժամանակ բավականին փորձառու է, և երրորդ` նա վերջին
 տարում կարծես փորձում էր նմանվել Ջերարդին: Այստեղ ամեն ինչ պարզ է և Հենդերսոնն էլ արժանի է «Լիվերպուլի» ավագը լինելու:
 Իսկ ահա փոխավագի հարցը, համենայնդեպս ինձ պարզապես զարմացրեց և ինչու ոչ հիասթափեցրեց: Ես իհարկե  գնահատում եմ Ջեյմս Միլների առաջնորդին հատուկ որակներն ու իր անձնուրաց նվիրումը խաղին, բայց նրան ոչ մի կերպ չես համեմատի Մարտին Շկրտելի  հետ: Սլովակ պաշտպանը բազմիցս հաստատել է իր բարձր կարգն ու   եկել էր ժամանակը որպեսզի թիմը փոխատուցեր, բայց... Կարծում եմ հենց սա էր պատճառը, որ Շկրտելը մրցաշրջանի մեկնարկից առաջ մի պահ հրաժարվում էր երկարաձգել իր պայմանագրի ժամկետը:

Տիտղոսները:
 Իսկ ավելի կոնկրետ դրանց բացակայությունը: Երեք տարի առանց տիտղոսների, անկասկած սա չի կարող գոհացնել ո՛չ թիմի երկրպագուներին, ո՛չ էլ ղեկավարությանը: Բայց արդարության համար պետք է նշել, որ Բրենդան Ռոջերսը իր նախորդներից ամենամոտն է եղել չեմպիոնությանը: Խոսքը 2013-2014 մրցաշրջանի մասին է: Բայց այդ տարի «Չելսիի» հետ անշուք խաղը, Ջերարդի չարաբաստիկ սայթաքումը և «Կրիստալ Փելասի» դեմ խայտառակ հանդիպումը` փաստացի զրկեցին «Լիվերպուլին» այդքան սպասված չեմպիոնությունից: Արդյունքում «Լիվերպուլը» զբաղեցրեց  2-րդ հորիզոնականը: Իսկ լեգենդար Բիլլի Շենկլին մի առիթով ասել էր.
«Եթե դու առաջինն ես`  դու առաջինն ես, իսկ եթե դու երկրորդն ես` դու ոչ-ոք ես»:

                                                     ՆԿԱՐ 2

Ամեն դեպքում պետք է նաև նշել Բրենդան Ռոջերսի գրանցած այն արդյունքները, որոնցով նա միշտ կմնա «Լիվերպուլի» պատմության մեջ:

* Բրենդան Ռոջերսի հետ «Լիվերպուլը» միջինում 1 խաղում վաստակել է 1.8 միավոր:          Սա ակումբի պատմության մեջ երկրորդ ամենալավ արդյունքն է (առաջին տեղում              Ռաֆայել Բենիտեսն է 1.9 միավոր` 1 խաղում):

   Բրենդան Ռոջերսի ղեկավարության  ժամանակ «Լիվերպուլը» երբեք չի                                  պարտվել մերսիսայդյան դերբիում: Արդյունք` որով չեն կարողանա                                        հպարտանալ «Լիվերպուլի»     նախկին գլխավոր մարզիչները:   

Մեսութ Օզիլ: Գոլային փոխանցումների արքան

Վերջերս  հանրահայտ ծաղրանկարիչ Օմար Մոմանին իր բլոգում  հրապարակել էր այս նկարն ու մակագրել հետևյալ գրությամբ:

-«Մեսութ Օզիլին շատ հաճախ քննադատում են ասելով, որ նա աննկատ է խաղադաշտում` հիմա դուք տեսնում եք նրան, իսկ հետո  ոչ»:

Փորձենք ավելի մանրամասն վերլուծել «Արսենալի» և Գերմանիայի ազգային հավաքականի ֆուտբոլիստ Մեսութ Օզիլի ցուցադրած արդյունքներն այս մրցաշրջանում. հասկանալու համար թե որքա՞ն անհիմն են քննադատների` այդ թվում նաև Օմար Մոմանիի բացասական կարծիքները:

Վերոհիշյալ  նկարն Օմար Մոմանիի բլոգում հայտնվել է հոկտեմբերի 17-ին: Պատահականություն է, թե՞ ոչ, բայց հենց այդ օրը, Մեսութ Օզիլն իրեն պարզապես հիանալի դրսևորեց «Ուոթֆորդի» հետ արտագնա խաղում` դառնալով 2  գոլային փոխանցման հեղինակ:

Ընդհանարապես այս մրցաշրջանը պարզապես հրաշալի է դասավորվում գերմանացու համար: Ահա նրա վիճակագրությունը վերջին 3 ամսում:

                             

Անգլիայի Պրեմիեր Լիգայի այս մրցաշրջանում անցկացրած 10 հանդիպումներից հետո, Մեսութ Օզիլն իր հաշվին ունի գրանցած 9 գոլային փոխանցում:  Այս պահի դրությամբ սա եվրոպական «թոփ 5» առաջնություններում ամենաբարձր ցուցանիշն է:
 Բացի այդ,  սկսած 2013 թվականի սեպտեմբերից` երբ Օզիլն իր նորամուտը նշեց «Արսենալի» կազմում, նա կատարել է 23 գոլային փոխանցում: Այս ցուցանիշով նա ևս առաջատար է, քանի որ, տվյալ ժամանակահատվածում ԱՊԼ-ում խաղացող ոչ մի ֆուտբոլիստ չի կատարել ավելի շատ գոլային փոխանցումներ:
  Օզիլի ֆենոմենալ արդյունքների շարքը  այսքանով չի ավարտվում: «Սուոնսիի» դեմ  խաղում կատարելով  2 գոլային փոխանցում, Մեսութ Օզիլը Պրեմիեր Լիգայի ռեկորդ սահմանեց` շրջանցելով լեգենդար Էրիկ Կանտոնային:  Նա դարձավ միջին ցուցանիշով ամենաարդյունավետ գոլային փոխանցում կատարող ֆուտբոլիստը `58 անցկացրած հանդիպում և 23 գոլային փոխանցում: Սա բացարձակ ռեկորդ է (Հաշվի են առնվել այն ֆուտբոլիստներն, ովքեր կատարել են ամենաքիչը 20 գոլային փոխանցում):
 

Իսկ հիմա վերադառնանք Օզիլի հասցեին հնչող  անհիմն քննադատություններին:
 Մեսութ Օզիլը ժամանակակից ֆուտբոլի այն եզակիներից է, որին կարելի է հստակ համարել փլեյմեյքեր` այսինքն խաղարկող: Միթե՞ ձեզանից ոչ մեկի մտքով չի անցել թե ի՞նչն էր «Արսենալում» անցկացրած  առաջին մրցաշրջանում Մեսութ Օզիլի վատ խաղի պատճառը:
 Բանն այն է, որ Օզիլը կարելի է ասել նման է ծաղիկի: Ինչպես յուրաքանչյուր ծաղիկի անհրաժեշտ է ջուր շողշողալու և բացվելու համար, այնպես էլ Օզիլին խաղադաշտում անհրաժեշտ է` որքան հնարավոր է շատ գնդակ ստանալ:
 Երբ 2013 թվականին Օզիլը լքեց Մադրիդի «Ռեալն», այդ ժամանակ թիմի նոր գլխավոր մարզիչ Կառլո Անչելոտին հայտարարեց, որ գերմանացին պարզապես չի կարողանում ընդգրկվել իր նախընտրած 4-3-3 տակտիկական սխեմայում: Օզիլի համար ամենալավ տակտիկական սխեման 4-2-3-1 է, որտեղ նա գործում է հենց «10» համարի դիրքում:
  Եվ այսպես անդրադառնալով «Արսենալում» նրա անցկացրած առաջին մրցաշրջանին, պետք է նշել, որ Արսեն Վենգերը փորձում էր Օզիլին հնարավորինս լավ ընդգրկել թիմի խաղում: Բայց թիմի կազմում ունենալով այնպիսի ֆուտբոլիստներ` ինչպիսիք են Կասորլան, Ռեմսին, Ուիլշերը և ցանկացած հենակետային կիսապաշտպան (որը սկզբից Ֆլամինին էր, իսկ հիմա Կոկլենը), այդ գործնթացը բարդացավ: Սակայն, «պրոֆեսորը» կարողացավ գտնել իդեալական համադրություն դաշտի կենտրոնում, որը սկսեց իրեն արդարացնել արդեն նախորդ մրցաշրջանի կեսերից: Նկատեք, որ Օզիլին կոնկրետ «10» համարի դիրքում խաղացնելու համար Վենգերը դիմեց հետևյալ քայլերի`
1) Ռեմսիին կենտրոնական կիսապաշտպանի գոտուց տեղափոխեց եզր
2) Կիսապաշտպանության կենտրոնում առաջացած բացը լրացրեց Կասորլային ետ իջեցնելով
3) Ենթահարձակվողի ազատ դիրքում խաղացրեց Օզիլին

Փաստացի փոփոխելով թիմի ամբողջ կիսապաշտպանական գիծը, Վենգերը կարողացավ Օզիլին տալ այն ազատությունն, որն անչափ անհրաժեշտ է փետուրի պես թեթև, ծաղկի պես նուրբ գերմանացուն:

Եթե Օզիլն այս տեմպերով շարունակի, ապա շատ հնարավոր է, որ ընթացիկ մրցաշրջանում կարող է գերազանցել լեգենդար Թիերի Անրիի ցուցանիշը` 1 մրցաշրջանում կատարած գոլային փոխանցումների քանակով: Անրին 2002-2003 մրցաշրջանում կատարել է 20 գոլային փոխանցում: