Անգլիայի պրեմիեր

ԹՈՓ 10 ՏՐԱՆՍՖԵՐՆԵՐ, ԸՍՏ` SKY SPORTS FANTASY FOOTBALL-ի

Մարսիալ, Չեխ թե՞ Վեյնալդում: Ո՞վ է համարվում Անգլիայի Պրեմիեր Լիգայի այս մրցաշրջանի լավագույն ձեռքբերումը:

Արսեն Վենգերը  կարողացավ 10 մլն ֆունտով  իր թիմ հրավիրել «Չելսիի» նախկին դարպասապահ Պետր Չեխին: Վերջինս այս մրցաշրջանում արդեն իսկ հասցրել է 10 «չոր» հանդիպում անցկացնել, որը ռեկորդային ցուցանիշ է:

Սակայն, Sky Sports Fantasy Football-ի այս մրցաշրջանի լավագույն ձեռքբերումների մեջ Չեխիայի ազգային հավաքականի դարպասապահը զբաղեցնում է երկրորդ հորիզոնականը:


ԹՈՓ 10 ՏՐԱՆՍՖԵՐՆԵՐ, ԸՍՏ` SKY SPORTS FANTASY FOOTBALL-ի

9-10. Գլեն Ջոնսոն, «Սթոք Սիթի» (79 միավոր)

                                  

Անգլիայի ազգային հավաքականի և «Լիվերպուլի» նախկին աջ պաշտպանը կարողացավ միանգամից շահել Մարկ Հյուզի վստահությունը: Ջոնսոնն իր բարձր պաշտպանական որակներով օգնեց Ջեք Բաթլենդին Պրեմիեր Լիգայի 9 խաղերում անառիկ պահել սեփական դարպասը: Բացի այդ, Ջոնսոնը արդեն իսկ հասցրել է կատարել 3 գոլային փոխանցում:


9-10. Դիմիտրի Պայետ, «Վեսթ Հեմ» ( 79 միավոր)

                                            


Եթե չլինեին վնասվածքներն, ապա Պայետն այս ցուցակում անկասկած  ավելի բարձր հորիզոնական կզբաղեցներ: Այնուամենայնիվ, Պայետն արդարացնում է իր համար վճարված 10 մլն ֆունտ գումարը, ինչի ապացույցն են հանդիսանում նրա խփած 6 գոլերն ու 4 գոլային փոխանցումները:


8. Քրիստիան Բենտեկե, «Լիվերպուլ» (80 միավոր)

Բենտեկեն դուրս է մնացել Յուրգեն Կլոպի «Լիվերպուլի» մեկնարկային կազմից: Բայց ասել, որ բելգիացու համար վճարված 32.5 մլն ֆունտն անտեղի էր` սխալ կլինի: «Ասթոն Վիլլայի» նախկին ֆուտբոլիստն այս մրցաշրջանում խփել է 6 գոլ, կատարել 2 գոլային փոխանցում և 3 անգամ ճանաչվել է հանդիպման լավագույն ֆուտբոլիստ:


7. Անտոնի Մարսիալ, «Մանչեսթեր Յունայթեդ» (82 միավոր)

Նախորդ ամառվա ամենաթանկ տրանսֆերը, որի գումարը կարող է աճել մինչև 57.6 մլն ֆունտ: Անտոնի Մարսիալն իր նորամուտի խաղում` «Լիվերպուլի» դեմ, դարձավ գոլի հեղինակ: Հետո երիտասարդ ֆրանսիացին դարձավ դուբլի հեղինակ «Սաութհեմփթոնի» դեմ խաղում: Ընդհանուր առմամբ Պրեմիեր Լիգայի այս մրցաշրջանում Մարսիալը մեկնարկային կազմում խաղադաշտ է դուրս եկել 16 անգամ` դառնալով 5 գոլի և 3 գոլային փոխանցման հեղինակ: Սակայն վերջին շրջանում «Մանչեսթեր Յունայթեդի» նորեկի արդյունավետությունը զգալիորեն նվազել է:



6. Տոբի Ալդերվեյրելդ, «Տոտենհեմ» (83 միավոր)

Տոբի Ալդերվեյրելդին ձեռք բերելու հարցում առաջ ընկավ «Տոնտոնհեմը»` գերազանցելով «Սաութհեմփթոնին»: Նախորդ մրցաշրջանում Տոբին առաջին անգամ ծանոթացավ անգլիական ֆուտբոլի հետ` հենց «Սաութհեմփթոնում» վարձավճարով հանդես գալու ժամանակ: Այս մրցաշրջանում բելգիացի պաշտպանն առանցքային դեր ունի Մաուրիսիո Պոչետինոյի թիմում: «Տոտենհեմը» այս մրցաշրջանի 23 խաղում բաց է թողել ընդամենը 19 գնդակ` որը լավագույն արդյունքն է Պրեմիեր Լիգայի
 թիմերի մեջ: Ինչպես նաև,  Ալդերվեյրելդը դարձել է 2 գոլի և 3 գոլային փոխանցման հեղինակ:


5. Ռահիմ Ստեռլինգ, «Մանչեսթեր Սիթի» (86 միավոր)

Ռահիմ Ստեռլինգի «Լիվերպուլից» «Մանչեսթեր Սիթի» տեղափոխությունը կանխատեսելի էր և անկասկած օգնեց նրան ավելի առաջ գնալու: Երիտասարդ անգլիացին չնայած վերջին անհաջողություններին բավականին լավ է ինտեգրվել նոր թիմում և փորձում է օգնել «Մանչեսթեր Սիթիին» տիտղոսներ նվաճել: «Բորնմուտի» դեմ խաղում Ստեռլինգը հետ-տրիկ ձևակերպեց, իսկ ընդհանուր առմամբ նրա ակտիվում կա 5 գոլ և 3 գոլային փոխանցում: Այս մրցաշրջանում Ստեռլինգը «քաղաքայինների» մեկնարկային կազմում հայտնվել է 18 անգամ:


4. Կևին Դե Բրույնե, «Մանչեսթեր Սիթի» (94 միավոր)

Կևին Դե Բրույնեն  «Մանչեսթեր Սիթիին» արժեցավ 54 մլն ֆունտ, երբ ընդամենը 19 ամիս առաջ «Չելսին» նրան 18 մլն ֆունտով վաճառեց «Վոլֆսբուրգին»: Ամեն դեպքում բելգիացի տաղանդը կարողացավ իրեն լավագույնս դրսևորել նոր ակումբում` դառնալով 5 գոլի և 9 գոլային փոխանցման հեղինակ: Ամեն ինչ վկայում է այն մասին, որ Դե Բրույնեի լավագույն տարիները դեռևս առջևում են:


3. Անդրե Այու, «Սուոնսի Սիթի» (98 միավոր)

Երբ նախորդ մրցաշրջանում Այուն ֆրասիական «Մարսելի» կազմում դարձավ 10 գոլի հեղինակ` քչերն էին կարծում, որ ազատ գործակալի կարգավիճակով «Սուոնսի» տեղափոխվելուց հետո նա կդառնա թիմի առանցքային խաղացողներից մեկը: Սակայն գանացի կիսապաշտպանը Պրեմիեր Լիգայի իր առաջին 8 խաղերում դարձավ 4 գոլի հեղինակ. այն էլ այնպիսի մրցակիցների դեմ  ինչպիսիք են` «Չելսին», «Մանչեսթեր Յունայթեդը» և «Տոտենհեմը»: Իսկ ընդհանուր առմամբ Այուն դարձել է 8 գոլի և 3 գոլային փոխանցման հեղինակ:


2. Պետր Չեխ, «Արսենալ» (104 միավոր)

«Չելսիի» նախկին դարպասապահը լրացրեց Արսեն Վենգերի թիմում տիրող մեծ բացը: Պետր Չեխը անցկացրած 23 խաղերից 10-ում անառիկ է պահել սեփական դարպասը և 3 անգամ ճանաչվել է հանդիպման լավագույն ֆուտբոլիստ` վերջին անգամ «Սթոք Սիթիի» դեմ կայացած գոլազուրկ խաղում:


1. Ժորժինյո Վեյնալդում, «Նյուքասլ» (115 միավոր)

«Նյուքասլի» ցուցադրած խաղը այս մրցաշրջանի առաջին հատվածում հեռու է իդեալական լինելուց, սակայն Ժորժինյո Վեյնալդումի խաղը` ում ձեռք են բերել Հոլանդիայի առաջնության նախորդ մրցաշրջանի չեմպիոն «ՊՍՎ»-ից, արժանի է հիացմունքի: Այն, որ այժմյան «Նյուքասլը» կարողանում է մեկ խաղի ընթացքում 6 գոլ խփել մրցակցի դարպասը, դա արդեն իսկ անհավանական է, իսկ երբ այդ նույն խաղում պոկերի հեղինակ է դառնում Վեյնալդումը, դա պարզապես ֆանտաստիկ է: Հոլանդացին այս մրցաշրջանում դարձել է 9 գոլի և 4 գոլային փոխանցման հեղինակ:


                                                                     Պատրաստեց` Միհրան Ալեքսանյանը
                                                                             Օգտագործված աղբյուր` Sky Sports

Հավանական սերնդափոխություն ազգային հավաքականում

Երբ Հայաստանի հավաքականի նորանշանակ գլխավոր մարզիչ Վարուժան Սուքիասյանը հարցազրույցների ժամանակ անընդհատ նշում էր, որ թիմ է հրավիրելու բացառապես խաղային պրակտիկա ունեցող ֆուտբոլիստներին, կարծում եմ նկատի չուներ ամերիկյան կամ առավել ևս արաբական թիմերում խաղաժամանակ ստացած ֆուտբոլիստներին: Ինչպես արդեն գիտեք, մեր հավաքականի երբեմնի առաջատար Յուրա Մովսիսյանը կարիերան կշարունակի ԱՄՆ-ում, իսկ Մարկոս Պիցելլին` Սաուդյան Արաբիայում:

Եթե Մովսիսյանի դեպքում դեպքերի այսպիսի զարգացում ակնկալել կարելի էր, ապա Մարկոսի որոշումը լուրջ հարցեր է առաջացնում` որոնք առաջին հերթին վերաբերում են ազգային հավաքականին: Շատերը կփորձեն, կամ նույնիսկ արդեն սկսել են քարկոծել  Մովսիսյանին և Մարկոսին պատճառաբանելով, որ նրանք փողը գերազանցեցին ֆուտբոլից: Ճիշտ է, ամեն ոք ունի իր կարծիքը, սակայն պետք չէ այն այսպես ասած «փաթաթել մյուսների վզին»: Պարզապես պետք է հասկանալ, որ ոչ ոք ոչ մեկին պարտական չէ: Մենք` երկրպագուներս, իրավունք չունենք մեկնաբանել,առավել ևս քննադատել, մեր ազգային հավաքականի ֆուտբոլիստների թե՛ ֆուտբոլային, թե՛ անձնական կյանքը:  Հիմա անդրադառնանք ազգային հավաքականի հավանական խնդիրներին` կապված մեր երկու ֆուտբոլիստների նորաթուխ տրանսֆերներով:

Այն, որ Մարկոսը վերջին տարիներին համարվում է Հայաստանի ազգային հավաքականի առաջատարներից մեկը, դա փաստ է: Բայց հիմա կարծում եմ բոլորն էլ հասկանում են, որ Սաուդյան Արաբիայում հանդես եկող ֆուտբոլիստը` անկախ իր մակարդակից, կարող է չհամապատասխանել հավաքականի պահանջներին: Նույնը նաև Մովսիսյանի դեպքում` մի փոքր բացառությամբ: Ամեն դեպքում ԱՄՆ-ում այսօր հավաքված են այնպիսի աստղեր, որոնց հետ մրցակցելը կարող է լրացուցիչ մոտիվացիա հանդիսանալ Յուրայի համար: Սակայն եթե Վարուժան Սուքիասյանի որոշմամբ այս երկու ֆուտբոլիստները չհրավիրվեն հավաքական, կարծում եմ այդքան էլ անսպասելի չի լինի:
Չնայած վստահ եմ, որ նրանք իրենց  հնարավորությունը կստանան:

Որքան էլ որ պարադոքսալ թվա, բայց հնարավոր է, որ այս պահը բեկումնային լինի մեր հավաքականի հետագա զարգացման և առաջխաղացման համար:  Վարուժան Սուքիասյանը կկարողանա հնարավորություն տալ երիտասարդ և հեռանկարային ֆուտբոլիստներին: Իսկ երկրպագուները դժվար է դատապարտեն նրա այսպիսի հավանական որոշումը` անկախ դրա արդյունքից:

Եվրոպայի ամենահարուստ ակումբների ֆինանսական շարժը

Սպասվում է, որ առաջիկա 12 ամիսների ընթացքում «Մանչեսթեր Յունայթեդը» կդառնա աշխարհի ամենահարուստ ֆուտբոլային ակումբը:

«Deloitte»-ի վարկանիշով` որը գնահատում է ակումբների ֆինանսական շարժը, 11-րդ տարին անընդմեջ առաջատար է ճանաչվել Մադրիդի «Ռեալը»: 2014-2015 թթ մրցաշրջանում իսպանական ակումբը վաստակել է 577 մլն եվրո (439 մլն ֆունտ):
Կատալոնական «Բարսենոլան» երկրորդն է` 560.8 մլն եվրո  (426.6 մլն ֆունտ), «Մանչեսթեր Յունայթեդը» երրորդը` 519.5 մլն եվրո (395.2 մլն ֆունտ):

Նույն «Deloitte» կարծիքով, գոյություն ունի «իրական հնարավորություն», որ «Մանչեսթեր Յունայթեդը» կկարողանա այս տարվա ընթացքում գերազանցել իսպանական ակումբներին:

Ի՞ՆՉ Է «DELOITTE»-ը

«Deloitte»-ը հաշվապահական ընկերություն է, որի սպորտային բիզնեսի բաժինն ամեն տարի հրապարակում է աշխարհի ամենաեկամտաբեր ակումբների աղյուսակը:

Թոփ 20 ակումբների շահույթի հանրագումարը նախորդ տարվա համեմատ ավելացել է 8 %-ով և կազմել` 6.6 մլրդ եվրո (5.08 մլրդ ֆունտ): Սա ռեկորդային ցուցանիշ է:

«Մանչեսթեր Յունայթեդը» չկարողացավ հայտնվել ո՛չ Չեմպիոնների Լիգայում, ո՛չ Եվրոպա Լիգայում, ու հենց այդ պատճառով էլ նահանջեց երրորդ հորիզոնական:


Բայց «Deloitte»-ը տեղեկացնում է, որ «ուժեղ առևտրային աճն» ու «տպավորիչ հովանավորական գործարքներ» կնքելու կարողությունը` ինչպես հանրահայտ «Adidas» ընկերության հետ կնքած պայմանագիրն է (տարեկան 75 մլն ֆունտ), փոխհատուցեցին եվրոգավաթների բացակայությունը:

Մադրիդի «Ռեալը» հաջորդ մրցաշրջանից սկսած կհայտնվի «աճող ճնշման տակ»` Անգլիայում ուժի մեջ մտնող 5.1 մլրդ ֆունտ արժողությամբ հեռուստատեսային հեռարձակման  պայմանագրի պատճառով:

Այդ պայմանագրի շնորհիվ, Անգլիայի Պրեմիեր Լիգայի 17 ակումբներ կհայտնվեն աշխահի 30 ամենահարուստ ակումբների շարքում:

Անգլիական «Վեստ Հեմը»  2005-2006 թթ մրցաշրջանից հետո առաջին անգամն է, որ հայտնվում է Թոփ 20-ում` վաստակելով 160.9 մլն եվրո  (122.4 մլն ֆունտ), որը գերազանցում է թուրքական «Գալաթասարայի» արդյունքը:

«Մանչեսթեր Յունայթեդը»  «Deloitte»-ի վարկանիշով զբաղեցնում էր առաջին հորիզոնականը 1998 թվականին, երբ «Կարմիր սատանաների» եկամուտը
 կազմել էր 87.9 մլն ֆունտ:

Այդ վերլուծությունը 18 տարի առաջ կազմել էր Դեն Ջոնսը: Հիմա նա վերհիշում է, որ իրեն հարցնում էին արդյո՞ք այս ամենը երկար կյանք կունենա:

«Ես մինչև հիմա մտածում եմ, որ սա աճող շուկա է: Եթե նույնիսկ ինչ-որ բան էլ տեղի ունենա, ապա դա հաջորդ մի քանի տարիների ընթացքում  կլինի միայն աճ: Հնարավոր է, որ ակումբները փոքր ինչ հավասարվեն իրենց եկամուտներով: Սա ավելի հավանական է քան եկամուտների անկումը»,- նշում է Դեն Ջոնսը:


 Մադրիդի «Ռեալը», «Բարսելոնան», «Մանչեսթեր Յունայթեդը» և Մյունխենի «Բավարիան», սկսած 2008 թվականից միշտ հայտնվում են Թոփ 5-ում:

Ֆրանսիական ակումբային ֆուտբոլի բացարձակ առաջատար «ՊՍԺ»-ն վերջին երեք տարիներին նույնպես հայտնվում է Թոփ 5-ում:

Այս տարի «Մանչեսթեր Սիթին» հայտնվել է 6-րդ հորիզոնականում, իսկ 7-ից 9-րդ հորիզոնականները ներառյալ համապատասխանաբար զբաղեցնում են` «Արսենալը», «Չելսին», «Լիվերպուլը»:

Իտալական Ա Սերիայի չեմպիոն և Չեմպիոնների լիգայի եզրափակչի մասնակից «Յուվենտուսը», զբաղեցրել է 10-րդ հորիզոնականը:

Իտալական մեկ այլ ակումբ` «Միլանը», 2003-2005 թթ ընթանում էր 3-րդ տեղում, իսկ հիմա` 14-րդ:

«ՄԱՆՉԵՍԹԵՐ ՅՈՒՆԱՅԹԵԴԸ» ՊԵՏՔ Է ՍԿՍԻ ՆՎԱՃԵԼ

«Մանչեսթեր Յունայթեդի» երրորդ հորիզոնականը Չեմպիոնների Լիգայից դուրս մնալու հետևանքն է:
Սակայն, «Deloitte»-ը պնդում է, որ անգլիական ակումբը կարող է հաջորդ տարի հայտնվել վարկանիշային աղյուսակի ամենավերևում, չնայած նրան, որ այս տարի դուրս մնաց Չեմպիոնների Լիգայի խմբային փուլից:

«Մանչեսթեր Յունայթեդի» այս ցուցանիշն առևտրային հաջողությունների և ռեկորդային պայմանագրերի արդյունքն է:

Բայց, ակումբը սկսած 2013 թվականից` Սըր Ալեքս Ֆերգյուսոնի հեռանալուց հետո, ոչ մի տիտղոս չի նվաճել:
Դեն Ջոնսը կարծում է, որ «Մանչեսթեր Յունայթեդը» պետք է սկսի տիտղոսներ նվաճել, այլապես անընդհատ կնահանջի վարկանիշային աղյուսակում:

«Ինչ-որ ժամանակահատված հնարավոր է լինել հաջողակ դաշտի սահմաններից դուրս, նույնիսկ եթե ակումբի գործերը վատ են ընթանում: «Մանչեսթեր Յունայթեդի» առևտրային հաջողությունների պատճառը վերջին 20 տարիներին խաղադաշտում ցուցադրած անհավանական արդյունքն է: Ես զարմացած չեմ, որ ակումբը աղյուսակի առաջատարին այսքան մոտ է գտնվում և պայքարում է առաջին հորիզոնականի համար` որտեղ նրանք գտնվում էին 11 տարի առաջ: Բայց ես կարծում եմ,  որ նրանք չեն կարող երկար ժամանակ առաջատար լինել, եթե չսկսեն տիտղոսներ նվաճել»:

ՆՈՐԵԿՆԵՐԸ

«Վեստ Հեմն» ու «Ռոման» այս տարվա Թոփ 20-ի նորեկներն են: «Մուրճագործները» 2012 թվականին հայտնվելով   Չեմպիոնշիպում և 1980 թվականից հետո ոչ մի տիտղոս չնվաճելով վաստակել են 160.9 մլն ֆունտ, որն ընդամենը 3.9 մլն ֆունտով ավելի քիչ է քան իտալական  «Ինտերի» արդյունքը:

Լոնդոնյան ակումբի շահույթը զգալիորեն կավելանա, երբ նրանք հաջորդ մրցաշրջանից սկսած հանդես գան նոր մարզադաշտում:

«Ռոման» Վերջին 10 տարիների մեծ մասը անցկացրել է Թոփ 20-ից դուրս, իսկ հիմա ամերիկյան ներդրողների շնորհիվ ակումբի եկամուտը մեծանում է և թիմը սկսում է պայքարել չեմպիոնության համար:

ՊՐԵՄԻԵՐ ԼԻԳԱՅԻ ԳԵՐԱԿԱՅՈՒԹՅՈՒՆԸ

Վարկանիշային աղյուսակի Թոփ 20-ի մեջ հայտվել են Անգլիայի Պրեմիեր Լիգայի 9 ակումբներ:

Անգլիայի իրական ուժն արտացոլվում է Թոփ 20-ից դուրս: Թուրքական «Գալաթասարայը» զբաղեցնում է 21-րդ հորիզոնականը, իսկ իտալական «Նապոլին»` 30-րդ: Սակայն ամենատպավորիչն այն է, որ այս երկու թիմերի միջև հայտվել են 8 բրիտանական ակումբներ:

2014-2015 թթ մրցաշրջանի արդյունքով Անգլիայի  Պրեմիեր Լիգայից դուրս մնացած «Բերնլին», «Հալլ Սիթին» և «ՔՊՌ»-ը չեն հայտվել այս ցուցակում:

Անգլիական ակումբների գերակայությունը նպաստեց եվրոյի նկատմամբ ֆունտ ստեռլինգի աճին, իսկ մայրցամաքից ֆուտբոլիստներ գնելը դարձավ ավելի ձեռնտու:

Բացի դրանից զգալիորեն ավելացան հեռուստատեսությունների կողմից առաջարկվող պայմանագրերի գումարները: Հենց դրա շնորհիվ էլ «Սթոք Սիթին» կարողացավ 12 մլն ֆունտով ձեռք բերել Ջերդան Շաքիրիի տրանսֆերը, իսկ Պրեմիեր Լիգայի այս տարվա նորեկ` «Բորնմուտը» կարողացավ վարձակալական հիմունքներով թիմ հրավիրել Խուան Իտուրբեին:

ԵՎՐՈՊԱԿԱՆ ՄՅՈՒՍ ԱԿՈՒՄԲՆԵՐԸ

Միլանյան ակումբները նահանջում են աղյուսակում, իսկ ֆրանսիական ակումբները` բացառությամբ «ՊՍԺ»-ի, ընդհանրապես անհետացել են Թոփ 30-ից: Այս ամենից պարզ է դառնում, որ եվրոպական ֆուտբոլի հիերարխիան փոխվում է:

Անգլիայի Պրեմիեր Լիգայի գերակայությունն անընդհատ աճում է և հաջորդ մրցաշրջանից սկսած ուժի մեջ կմտնի նոր` 5.14 մլրդ ֆունտ արժողությամբ  հեռուստատեսային հեռարձակման պայմանագիրը:

«Deloitte»-ի տեղեկություններով,  Ա Սերիայի ակումբներն եկամուտների հետ կապված խնդիրներ ունեն, քանի որ, իրենց մարզադաշտերը թույլ չեն տալիս խոշոր գումարներ վաստակել:

«Մեր կանխատեսումներով «Ռեալն» ու «Բարսելոնան» կմնան Թոփ 3-ում` նույնիսկ նոր հեռուստատեսային պայմանագրի առկայության դեպքում: «ՊՍԺ»-ն և «Բավարիան» կպայքարեն լավագույն հնգյակում տեղ զբաղեցնելու համար, ինչպես նաև այն անգլիական ակումբները, որոնք կհայտնվեն Չեմպիոնների Լիգայում: Եթե ուշադրություն դարձնենք 21-ից 30-րդ հորիզոնականններին, ապա կնկատենք, որ Պրեմիեր Լիգան զգալիորեն գերազանցում է իր մրցակիցներին»:


                                                                                                   Միհրան Ալեքսանյան

Անգլիայի Պրեմիեր Լիգայի լավագույն կիսապաշտպանները

Պրեմիեր Լիգայի ընթացիկ մրցաշրջանում ո՞ր կիսապաշտպանի խաղն է ամենից շատ տպավորում:

Ռիհադ Մահրեզն ու Մեսութ Օզիլը այս անվանակարգում հաղթողի հիմնական հավակնորդներն են: Իրենց լավագույնս դրսևորել են նաև Ռոս Բարկլին` «Էվերթոնից»,  Կևին դե Բրույնեն` «Մանչեսթեր Սիթիից» և  Նգոլո Կանտեն` «Լեսթերից»:  Սակայն...
Ի տարբերություն մնացած խաղային դիրքերի, կիսապաշտպանական դիրքում հանդես եկող ֆուտբոլիստները բաժանվում են երկու խմբի` հարձակողական և պաշտպանական: Օրինակ` ճիշտ չի լինի համեմատել  հենակետային Նգոլո Կանտեին  փլեյմեյքեր Մեսութ Օզիլի հետ:



Ուսումնասիրենք հանրահայտ «Օpta» վիճակագրական կայքի տվյալները:




ՓՈԽԱՆՑՈՒՄՆԵՐ

Որքան էլ որ, զարմանալի է ամենաշատ ճշգրիտ փոխանցումներ կատարել է Հարի Արտերը «Բորնմուտից» (1107): Փոքր ինչ ետ են մնացել Սեսկ Ֆաբրեգասը` «Չելսիից» (1091) և Գարեթ Բարին` «Էվերթոնից» (1079): 1000 ճշգրիտ փոխանցումների սահմանը հատել են նաև Մեսութ Օզիլը և Սանտի Կասորլան`  «Արսենալից» ու  Ֆերնանդինյոն` «Մանչեսթեր Սիթիից»:

Այն կիսապաշտպաններից, ովքեր կատարել են ամենաքիչը 300 փոխանցում, ճշգրտության լավագույն տոկոսային հարաբերությունը Ֆրանսիս Կոկլենինն է` «Արսենալից» (91.47 %): Բացի Կոկլենից, 90 %-ից բարձր փոխանցումների ճշգրտություն ունեն Մորգան Շներյդերլինը` «Մանչեսթեր Յունայթեդից», Իբրահիմ Աֆելայը` «Սթոկ Սիթիից», Սանտի Կասորլան` «Արսենալից», Լեոն Բրիտոնը` «Սուոնսիից»:

Ուշադրություն դարձրեք այն հանգամանքին, որ վերոնշյալ բոլոր ֆուտբոլիստները հանդես են գալիս կենտրոնական կիսապաշտպանի դիրքում և զարմանալի չէ, որ հենց նրանք են այս ցուցակում առաջատարները, քանզի փոխանցումների մեծ մասը կատարվել է դաշտի կենտրոնական հատվածում:

ԳՈԼԱՅԻՆ ՓՈԽԱՆՑՈՒՄՆԵՐ

Գոլային փոխանցումների առումով իրեն հավասարը չունի «Արսենալի» գերմանացի կիսապաշտպան Մեսութ Օզիլը (16): Նրա կատարած գոլային փոխանցումները կրկնակի անգամ գերազանցում են Կևին դե Բրույնեի ցուցանիշը (8): Օզիլը գտնվում է Թիերի Անրիի` մեկ մրցաշրջանում կատարած ամենաշատ գոլային փոխանցումների ռեկորդը, գերազանցելու ճանապարհին: Վերջինս 2002-2003թթ մրցաշրջանում կատարել էր 20 գոլային փոխանցում: Ռոս Բարկլին` «Էվերթոնից», Դավիդ Սիլվան` «Մանչեսթեր Սիթիից» և Ռիհադ Մահրեզը` «Լեսթերից», կատարել են 7-ական գոլային փոխանցում:

ԳՈԼԵՐ

Պրեմիեր Լիգայի կիսապաշտպանների մեջ խփած գոլերի առումով, բացարձակ առաջատար է Ռիհադ Մահրեզը` «Լեսթերից»: Նա 13 անգամ կարողացել է ստիպել մրցակից թիմին խաղը վերսկսել դաշտի կենտրոնից:  Ալժիրցու մոտակա հետապնդողը Ժորժինյո Վեյնալդումն է` «Նյուքասլից» (7): Ռոս Բարկլին` «Էվերթոնից»  և Անդրե Այուն` «Սուոնսիից», դարձել են 6-ական, իսկ Ֆելիպե Կոուտինյոն` «Լիվերպուլից», Դելե Ալին` «Տոտենհեմից» և Յայա Տուրեն` «Մանչեսթեր Սիթիից», 5-ական գոլի հեղինակ:

ՍՏԵՂԾԱԾ ԳՈԼԱՅԻՆ ՊԱՀԵՐ

Այս ցուցանիշով ևս լավագույնը Մեսութ Օզիլն է: Նա ստեղծել է 84 գոլային պահ` միջինը մեկ խաղում 4.4: Օզիլին մնացել է ստեղծել ևս 16 գոլային պահ, որպեսզի գերազանցի նախորդ մրցաշրջանի լավագույն արդյունքը, որը պատկանում էր Էդեն Ազարին (100):
Երկրորդ հորիզոնականում է գտնվում Կևին դե Բրույնեն` «Մանչեսթեր Սիթիից»: Բելգիացին իրեն շատ լավ է դրսևորում նոր ակումբում և արդեն իսկ կարողացել է ստեղծել 55 գոլային պահ: Դուշան Տադիչը` «Սաութհեմփթոնից» և Քրիստիան Էրիկսենը` «Տոտենհեմից», ստեղծել են 50-ական գոլային պահ: Բավականին բարձր միջին ցուցանիշ ունի նաև Դիմիտրի Պայետը` «Վեսթ Հեմից» (3.8), այն դեպքում, որ ֆրանսիացին վնասվածքների պատճառով երկար ժամանակ բացակայել է:

ՍՏԵՂԾԱԾ ՌԵԱԼ ԳՈԼԱՅԻՆ ՊԱՀԵՐ

Դժվար չէ կռահել, որ այս ցուցանիշով ևս առաջատար է Մեսութ Օզիլը: Նա ստեղծել է 21 ռեալ գոլային հնարավորություն: Բարձր է նաև Ռիհադ Մահրեզի ցուցանիշը (12): 8-ական ռեալ գոլային հնարավորություն են ստեղծել Մուսա Սիսոկոն` «Նյուքասլից» և Սադիո Մանեն` «Սաութհեմփթոնից»:

Կա մի վիճակագրական տվյալ, որը ոչ միայն հաճելիորեն կզարմացնի ձեզ, այլ նաև լավագույնս կընդգծի Մեսութ Օզիլի բաձր խաղային որակները:

Օզիլի կողմից ստեղծված գոլային պահերի քանակը գերազանցում է Պրեմիեր Լիգայի միանգամից 8 ակումբների ստեղծած գոլային պահերի հանրագումարը: Այդ ակումբներն են ` «Վեսթ Հեմը», «Բորնմուտը», «Սանդերլենդը», «Սուոնսին», «Ասթոն Վիլլան», «Նյուքասլը», «Նորվիչը» և «Ուոթֆորդը»:


ԳՆԴԱԿՆԵՐԻ ԽԼՈՒՄ

Բացի հարձակողական գործողություններից, կիսապաշտպանը պետք է նաև կարողանա լավ պաշտպանվել: Այս առումով Պրեմիեր Լիգայում առաջատար են Նգոլո Կանտեն` «Լեսթերից» և Լուկաս Լեիվան` «Լիվերպուլից»: Նրանց ակտիվում կա 58-ական գնդակի խլում: Այս երկու ֆուտբոլիստների խաղը հենակետային գոտում իրոք տպավորիչ է:

Եթե դիտարկենք այն կիսապաշտպաններին, ովքեր կատարել են ամենաքիչը 30 գնդակի խլում, ապա արդյունավետության լավագույն տոկոսային հարաբերությունը պատկանում է Էմրե Ջանին` «Լիվերպուլից»: Գերմանացի ֆուտբոլիստը 40-ից 37 դեպքերում, կարողացել է արդյունավետ կերպով գնդակ խլել մրցակցից (92.50 %): Բարձր ցուցանիշներ են գրանցել նաև Հարի Արտերը` «Բորնմուտից» (87.50  %) և Յոհան Կաբայը` «Քրիստալ Փելասից»   (85.19 %):

ՀԱՐՎԱԾՆԵՐԻ ԱՐԳԵԼԱՓԱԿՈՒՄ

Հարվածների արգելափակման առումով ևս լավագույնը Նգոլո Կանտեն է, ում գրանցած ցուցանիշը մի գլուխ բարձր է իր մոտակա հետապնդողի` Յոհան Կաբայի արդյունքից (81-ն ընդդեմ 66-ի): Այս ցուցանիշով երրորդ և չորրորդ հորիզոնականները համապատասխանաբար զբաղեցնում են Իդրիսա Գուեյեն` «Ասթոն Վիլլայից» (64) և Էթյեն Կապուն` «Ուոթֆորդից» (62):

ՀԱՂԹԱՀԱՐԱԾ ՄԻՋԻՆ ՏԱՐԱԾՈՒԹՅՈՒՆԸ

Դեն Գոսլինգը` «Բորնմուտից», միջինը մեկ խաղի ընթացքում հաղթահարում է 13.13 կմ տարածություն: Երկրորդն`  աշխատասեր Ջեյմս Միլներն է «Լիվերպուլից» (12.69 կմ): Նրան հաջորդում են Դելե Ալին` «Տոտենհեմից» (12.52 կմ), Ջեյմս Մակլինը` «Վեսթ Բրոմվիչից» (12.39 կմ) և Մարկո վան Գինկելը` «Սթոք Սիթիից» (12.26 կմ):  


                                                                             Պատրաստեց Միհրան Ալեքսանյանը
                                                  Oգտագործված աղբյուրներ՝ «Sky Sports», «Opta»

Ո՞վ է Պրեմիեր Լիգայի լավագույն պաշտպանը

Ո՞վ է Պրեմիեր Լիգայի այս մրցաշրջանի լավագույն պաշտպանը: Վերլուծելով որոշ վիճակագրական տվյալներ, փորձենք գտնել այս հարցի պատասխանը:

Տոբի Ալդերվեյրելդը, Լորան Կոսյելնին և Քրիս Սմոլինգը արժանի են գովասանքի:
Բայց պետք չէ մոռանալ նաև Ուինսթոն Ռիդին, Ուես Մորգանին և Էրիկ Պիտերսին:

Ուսումնասիրենք «Opta» վիճակագրական կայքի տվյալները:


ԳՆԴԱԿԻ ԽԼՈՒՄ

Այս ցուցանիշով առաջատար են եզրային պաշտպանները: Գնդակի ամենաշատ խլում կատարել է Էրիկ Պիտերսը` «Սթոկ Սիթիից»: Նրա ակտիվում կա գնդակի 80 խլում` միջինը մեկ խաղում 3.8:

Եթե հաշվի առնենք այն պաշտպաններին, ովքեր ամենաքիչը կատարել են գնդակի 30 խլում, ապա   արդյունավետ խլելու լավագույն տոկոսային հարաբերությունը Ադամ Սմիթինն է` «Բորնմուտից»: 24-ամյա պաշտպանը 42 դեպքից 39-ում (92.86 %) կարողացել է արդյունավետ կերպով խլել գնդակը:
Երկրորդ հորիզոնականը զբաղեցնում է Ալան Նյոմը` «Ուոթֆորդից» (87.72 %, 57 խլված գնդակ), երրորդը Կայլ Ուոլկերը` «Տոտենհեմից» (86.96 %, 46 խլված գնդակ): «Ասթոն Վիլլայի» պաշտպան Լեանդրո Բակունան կատարել է 30-ից քիչ գնդակի խլում. այդ պատճառով էլ նրա ցուցանիշը չի համեմատվում այս ֆուտբոլիստների գրանցած արդյունքի հետ:



ԳՐՈՀՆԵՐԻ ԽԱՓԱՆՈՒՄ

Կանխատեսել վտանգը` շատ կարևոր հատկանիշ է ցանկացած պաշտպանի համար: Այս գործում իրեն հավասարը չունի Լորան Կոսյելնին` «Արսենալից»: Ֆրանսիացին այս մրցաշրջանում 69 անգամ կարողացել է խափանել մրցակցի գրոհները` միջինը մեկ խաղում 3.8: Երկրորդ և երրորդ հորիզոնականները միմյանց մեջ կիսում են Էրիկ Պիտերսը` «Սթոկ Սիթիից» (58) և Ջոնի Էվանսը` «Վեստ Բրոմվիչից» (58):




ԳՆԴԱԿԻ ՀԵՌԱՑՈՒՄՆԵՐ

Գնդակներ հեռացնելը մտնում է պաշտպանի անմիջական պարտականությունների մեջ: Այս ցուցանիշով ամենաարդյունավետը` Սեբաստիան Բասոնգն է «Նորվիչից» (181): Մոտակա հետապնդողներն են Էշլի Ուիլյամսը` «Սուոնսիից» (163) և Տոբի Ալդերվեյրելդը` «Տոտենհեմից» (158):


ՀԱՐՎԱԾՆԵՐԻ ԱՐԳԵԼԱՓԱԿՈՒՄ

Մրցակցի  հարվածներին խոչընդոտ հանդիսանալը ևս կարևոր հատկանիշ է յուրաքանչյուր պաշտպանի համար: Այս գործում լավագույնը  «Սուոնսիի» պաշտպան Էշլի Ուիլյամսն է: Նա 28 անգամ կարողացել է արգելափակել մրցակցի հարվածները: Սքոտ Դանը` «Կրիստալ Փելասից» և Ֆաբրիցիո Կոլոչինին` «Նյուքասլից», արգելափակել են 26-ական հարված, իսկ Ուես Մորգանը` 23:



ՄԵՆԱՊԱՅՔԱՐՆԵՐ

Մենապայքարներ մղելուց չի խուսափում «Սթոկ Սիթիի» պաշտպան Էրիկ Պիտերսը: Նրա ակտիվում կա 244 մենապայքար:

Սակայն Պիտերսի մոտ այդքան էլ բարձր չէ հաղթած մենապայքարների տոկոսային հարաբերությունը: Այս ցուցանիշով (104 մենապայքար` 75% արդյունավետություն) լավագույնն է Ուինսթոն Ռիդը` «Վեստ Հեմից»: Նրան հաջորդում են Մայկա Ռիչարդսը` «Ասթոն Վիլլայից» (72.86 %) և Պեր Մերտեզակերը` «Արսենալից» (71.91 %):

ՓՈԽԱՆՑՈՒՄՆԵՐԻ ՃՇԳՐՏՈՒԹՅՈՒՆ

Այստեղ ևս լավագույնը «Սուոնսիի» ավագ Էշլի Ուիլյամսն է: Նա միակ պաշտպանն է, ում կատարած փոխանցումների քանակը գերազանցում է հազարը (1070):

Սակայն Ուիլյամսի մոտ փոխանցումների ճշգրտությունը կազմում է 87.13 %, որն ամենևին էլ լավագույն արդյունքը չէ: Իսկ առաջին հորիզոնականը միմյանց մեջ կիսում են Ջոն Թերին`  «Չելսիից» և Գաբրիել Պաուլիստան` «Արսենալից»: Նրանց փոխանցումների ճշգրտությունը կազմել է 89.89 %: Աննշան տարբերությամբ ետ են մնում Պեր Մերտեզակերը`  «Արսենալից» (89.74 %) և Ջոն Սթոունսը`  «Էվերթոնից» (89.43 %):


ՍՏԵՂԾԱԾ ԳՈԼԱՅԻՆ ՊԱՀԵՐ

Զարմանալի չէ, որ այս ցուցանիշով առաջատար են եզրային պաշտպանները: Ամենաբարձր արդյունքն ունի Ալբերտո Մորենոն` «Լիվերպուլից» (41 ստեղծած գոլային պահ): Շեյմուս Կոուլմենը` «Էվերթոնից», Գլեն Ջոնսոնը` «Սթոկ Սիթիից», ԱհարոնԿրեսուելը` «Վեստ Հեմից» և Բակարի Սանյան` «Մանչեսթեր Սիթիից», կատարել են 3-ական գոլային փոխանցում:  

Իսկ ահա ստեղծած ռեալ գոլային պահերով առաջատար է մեկ այլ իսպանացի` Հեկտոր Բելլերինը «Արսենալից»: Նա խաղընկերների համար ստեղծել է 7 ռեալ գոլային հնարավորություն: Բելլերինին զիջում են Գլեն Ջոնսոնը` «Սթոկ Սիթիից» (5)  և Ռայան Բերտրանը` «Սաութհեմփտոնից» (4):


ԳՈԼԵՐ

Բացի պաշտպանվելուց, պետք է նաև գոլեր հեղինակել: Լորան Կոսյելնին` «Արսենալից», Ռասել Մարտինը` «Նորվիչից» և Սկոտ Դանը` «Կրիստալ Փելասից», խփած 3-ական գոլերով կիսում են առաջին հորիզոնականը:


Այսպիսով, ներկայացված էին պաշտպանների համեմատության համար անհրաժեշտ գրեթե բոլոր վիճակագրական տվյալները: Իսկ ձեր կարծիքով, ո՞վ է Պրեմիեր Լիգայի լավագույն պաշտպանը:




                                                                         Պատրաստեց Միհրան Ալեքսանյանը                                                                                          Oգտագործված աղբյուր՝ «Sky Sports», «Opta» 

ՖԻՖԱ-ի «որսը» Մադրիդում կամ մեղադրում են մեղավորները

ՖԻՖԱ-ի կողմից  մադրիդյան  երկու ակումբների`  «Ռեալի» և «Ատլետիկոյի» վրա տրանսֆերային արգելանք սահմանելու լուրը ցնցեց ողջ ֆուտբոլային հասարակությունը: Ու խնդիրը բոլորովին էլ իսպանական ակումբների արդարության կամ անարդարության հարցը չէ: Վերջին մի քանի ամիսների ընթացքում գրեթե ամեն օր ՖԻՖԱ-ի հետ կապված սկանդալային լուրեր են հրապարակվում և  դրանց  գլխավոր թեման` կոռուպցիան է: Կաշառակերության մեջ մեղադրվեցին վերնախավի ներկայացուցիչները` ընդհուպ մինչև ՖԻՖԱ-ի նախագահ Զեպ Բլատերը: Ու չնայած նրան, որ վերջինս այս պահին  ժամանակավորապես հեռացված է ֆուտբոլային գործունեությունից միևնույնն է, սկանդալային բացահայտումները չեն դադարում:  Ու ի՞նչ է ստացվում է, որ մեղադրում են մեղավորներ՞ը:

Ինչևէ, երևի թե  ՖԻՖԱ-ն  փորձում է ապացուցել, որ համարվում է  աշխարհի ամենաարդար ֆուտբոլային կառույցը և հետաքննությունների շնորհիվ «ջրի երես» է հանում եվրոպական ակումբների կատարած տրանսֆերային խախտումները: 

  

Այս նյութում կփորձենք մանրամասն վերլուծել տեղի ունեցածը` պարզելու մադրիդյան ակումբների վրա տարածված արգելանքի հիմքերը, պատճառները և հետևանքները: 

ՖԻՖԱ-Ի «ԽԱՂԱՑՈՂՆԵՐԻ ԿԱՐԳԱՎԻՃԱԿԻ ԵՎ ՏԵՂԱՓՈԽՈՒԹՅԱՆ» ԿԱՆՈՆԱԿԱՐԳԸ

ՖԻՖԱ-ի կարգապահական կոմիտեն հետաքննություն անցկացնելով պարզել է, որ մադրիդյան երկու ակումբները խախտել են անչափահաս խաղացողների տրանսֆերների ձեռք բերման կանոնները: Այսինքն. «Ռեալը» և «Ատլետիկոն»  չեն կատարել  ՖԻՖԱ-ի կողմից հաստատված կանոնակարգի` «Խաղացողների կարգավիճակի և տեղափոխության» հիմնական դրույթների 5-րդ, 9-րդ և 19-րդ կետերը:

5-րդ  և 9 -րդ կետերը ավելի շատ փաստաթղթային բնույթի հարցերին են վերաբերում, իսկ ահա 19-րդ կետը սահմանում  է հատուկ անչափահաս խաղացողների ձեռքբերման կանոնները:

19-ՐԴ ԿԵՏ. ԱՆՉԱՓԱՀԱՍ ԽԱՂԱՑՈՂՆԵՐԻ ՊԱՇՏՊԱՆՈՒԹՅՈՒՆ

1. Միջազգային տրանսֆերները թույլատրելի են, եթե լրացել է խաղացողի 18 տարին. 

2. Այս դրույթի շրջանակներում գործում են երեք հետևյալ բացառությունները.

  2.1 Ֆուտբոլիստի ծնողները` ոչ ֆուտբոլային պատճառներով, ևս տեղափոխվում են նոր երկիր, որտեղ տեղակայված է ակումբը:

2.2 Տրանսֆերը  կատարվում է Եվրոպական Միության կամ Եվրոպական Էկոնոմիկական Գոտու տարածքում, իսկ ֆուտբոլիստի տարիքը` 16-18: 

   Այս դեպքում ֆուտբոլիստի նոր ակումբը պարտավոր է կատարել հետևյալ նվազագույն պահանջները.

  

  ա. Ապահովել խաղացողի համապատասխան ֆուտբոլային կրթությունը.

  բ. Ֆուտբոլային կրթությունից բացի, ապահովել խաղացողին ակադեմիական կամ դպրոցական, կամ պրոֆեսիոնալ ուսումով: Եվ որը կլինի երաշխիք ֆուտբոլիստի հետագա ոչ ֆուտբոլային կարիերայի ստեղծմանը, եթե նա դադարեցնի ելույթները պրոֆեսիոնալ ֆուտբոլում:

 գ. Կենցաղային հարցերի համապատասխան  ապահովում.

 դ. Խաղացողին գրանցելուց հետո, համապատասխան ասոցիացիային ներկայացնել ապացույցներ վերոնշյալ կետերի կատարման վերաբերյալ: 

3. Խաղացողի բնակատեղին պետք է նոր երկրի պետական սահմանից   գտնվի 50-100 կմ հեռավորության վրա: 

Այս կանոններից, գոնե մեկին համապատասխանելու դեպքում ակումբի կողմից կատարված տրանսֆերը համարվում է օրինական:

ՖԻՖԱ-ի տվյալներով  «Ռեալը» այս կետերից որևէ մեկը խախտել է 2005-2014 թթ ընկած ժամանակահատվածում, իսկ «Ատլետիկոն»` 2007-2014 թթ:

ՏՈՒԳԱՆՔՆԵՐՆ ՈՒ ՀԵՏԵՎԱՆՔՆԵՐԸ

ՖԻՖԱ-ն հիմք ընդունելով «Խաղացողների կարգավիճակի և տեղափոխության» հիմնական դրույթների հետևյալ կետերի խախտումը, որոշել է.

1. Տուգանել  «Ռեալին» 330 հզր եվրոյով, «Ատլետիկոյին»` 820 հզր եվրոյով:

2. Արգելել  հաջորդ երկու տրանսֆերային պատուհանների ժամանակ ֆուտբոլիստներ գրանցել: 

Սակայն, մինչև հունվարի 31-ը (ձմեռային տրանսֆերային պատուհանի ավարտը), ակումբների կողմից ձեռք բերված ֆուտբոլիստները կարող են գրանցվել: 

Բացի դրանից, երկու ակումբներն էլ ունեն հնարավորություն բողոքարկելու այս որոշումը` դիմելով Լոզանի Մարզական Արբիտրաժային Դատարան (CAS) :  Ե՛վ «Ռեալում», և՛ «Ատլետիկոյում» պաշտոնապես հաստատել են, որ համաձայն չեն կիրառված պատժամիջոցների հետ և պարտադիր կերպով բողոքարկելու են ՖԻՖԱ-ի կարգապահական կոմիտեի ընդունած որոշումը:

Իսկ եթե բողոքարկումը մերժվի, ապա թիմերը ամառային տրանսֆերային պատուհանի բացվելուց սկսած, մեկ տարվա ընթացքում իրավունք չունեն նոր ֆուտբոլիստներ գրանցել, սակայն.

* Կարող են վաճառել ակումբի ֆուտբոլիստների տրանսֆերները.

* Կարող են երկրորդ թիմից ակումբի սաներին  հրավիրել առաջին թիմ.

* Կարող են գրանցել վարձավճարից վերադարձած ֆուտբոլիստներին. 

Մեկ տարի զրկված լինել  նոր ֆուտբոլիստներ գրանցելու իրավունքից, իրոք որ, լուրջ պատիժ է` առավել ևս նման ակումբների համար: Հաշվ առնելով, որ նույն «Ռեալում» նոր մարզչական փոփոխություն է տեղի ունեցել, հնարավոր է, որ թիմում այս ձմեռային պատուհանի ժամանակ տեղի ունենան լուրջ ձեռքբերումներ: Բայց պետք է նաև հասկանալ, որ այդ տրանսֆերները կարող են լինել խուճապի արդյունք: 

ՆԱԽԱՆՇԱՆՆԵՐ


Իրականում, ՖԻՖԱ-ի «որսը» «Ռեալի» նկատմամբ սկսվել էր դեռևս նախորդ տարվա հունվար ամսին: Բայց «սերուցքայինների» ղեկավարությունը կարողացել էր բավարար ապացույցներ ներկայացնել 44 ֆուտբոլիստների վերաբերյալ: Այդ ժամանակ ևս ՖԻՖԱ-ն կասկածներ ուներ, որ «Ռեալը» անչափահասների տրանսֆերների և գրանցման հարցերում խախտումներ է թույլ տվել:

Հիմք ընդունելով վերևում ներկայացված կանոնները «Ռեալը» հետևյալ մեկնաբանությունն էր տվել.

 * 10 ֆուտբոլիստներ, որոնց գրանցման  օրինականությունը կասկածի տակ էր, պարզվեց իսպանացիներ էին.

 * 6 ֆուտբոլիստների տարիքը  18-ից բարձր էր.

 * 2 ֆուտբոլիստները պաշտոնապես գրանցվել էին.

 * 2 ֆուտբոլիստներ պայմանագիր էին կնքել` մինչ վերոհիշյալ կանոնակարգի ընդունումն ու հաստատումը.

 * 23 ֆուտբոլիստներ տեղափոխվել էին իսպանական ակումբներից.

 * 2 ֆուտբոլիստներ, երբեք չեն խաղացել մադրիդյան ակումբում.

 * 4 ֆուտբոլիստների վրա տարածվել է կանոնակարգի «բացառություն» կետը.

 * 1 ֆուտբոլիստ հետաքննության ավարտին ակումբում չի եղել.



Այսպես, արքայական ակումբը մեկ տարի առաջ կարողացել է հիմնավորել իր կատարած տրանսֆերները:

ԿԱՍԿԱԾԵԼԻ ԳՈՐԾԱՐՔՆԵՐՆ ՈՒ ԱԿՈՒՄԲՆԵՐԻ ՊԱՇՏՈՆԱԿԱՆ ՀԱՅՏԱՐԱՐՈՒԹՅՈՒՆՆԵՐԸ


«ՌԵԱԼ»

Ըստ Մադրիդի  «Ռեալի» գլխավոր գործադիր տնօրեն` Խոսե Անխել Սանչեսի, ՖԻՖԱ-ն հետաքննել է ակումբի 39 անչափահաս խաղացողների գործերը: Սակայն ակումբը պատժվել է 8 խաղացողների տրանսֆերների հավանական անօրինականության համար:
 Արքայական ակումբի ղեկավարությունը` հանձինս Խոսե Անխել Սանչեսի և իրավաբանական բաժնի ղեկավար Խավիեր Լոպես Ֆարեի, համոզված են, որ ոչ մի կերպ չեն խախտել ՖԻՖԱ-ի համապատասխան կանոնակարգը և լրագրողների հետ զրույցում ներկայացրել են մի շարք փաստաթղթեր:

Իսկ ամենավիճելի հարցն այն է, որ ակումբի ղեկավարությունը ևս չի հասկանում թե ինչո՞ւ են  այդ 8 ֆուտբոլիստների ցուցակում հայտնվել թիմի նորանշանակ գլխավոր մարզիչ Զինեդին Զիդանի երկու որդիները: Ակումբում վստահ են, որ ոչ միայն Զիդանի որդիների, այլև մնացած կասկածվող խաղացողների գործարքները կատարվել են բացառապես ՖԻՖԱ-ի կանոնակարգի համաձայն, այդ պատճառով էլ համոզված են, որ իրենց բողոքարկումը կհաստատվի:

Ինչպես հայտնի է այդ 8 ֆուտբոլիստների ցուցակում հայտնվել է նաև «Ռեալի» նախկին ֆուտբոլիստ Էզեկել Գարայի եղբայրը:


«ԱՏԼԵՏԻԿՈ»

«Ատլետիկոյի» դեպքում ամեն ինչ ավելի բարդ է: Այստեղ և՛ տուգանքի չափն է զգալիորեն շատ, և՛ գրանցած խախտումները: Ըստ ՖԻՖԱ-ի, Մադրիդի «Ատլետիկոն» մեղադրվում է 54 անչափահաս խաղացողների տրանսֆերների և գրանցման հարցերում սխալներ կատարելու համար:  «Ատլետիկոյի» ղեկավարությունը ՖԻՖԱ-ի կողմից մանրամասն բացատրություն է ստացել յուրաքանչյուր խաղացողի գործարքում կատարված  հավանական անօրինականության վերաբերյալ: Ինչպես նշվում է ՖԻՖԱ-ի կողմից ուղարկված հաղորդագրության մեջ` այդ 54 ֆուտբոլիստներից 11-ի հետ կատարված գործարքների ժամանակ գրանցվել են կոպիտ խախտումներ, իսկ մնացած 43-ի դեպքում` անհամեմատ ավելի թեթև:

Իսպանական մամուլի տեղեկություններով, այդ 11 ֆուտբոլիստների մեջ են մտնում չինացի Սյու Սինը և սենեգալցի Արոնա Սանեն:

Չինացի երիտասարդ ֆուտբոլիստը մարզվել է «Ատլետիկոյի» առաջին թիմի հետ նախամրցաշրջանային փուլում, որից հետո վարձավճարով տեղափոխվել է իր հայրենիքը ներկայացնող «Գուանչժու» ակումբ:

Սենեգալցի Արոնա Սանեն հանդես է գալիս «Ատլետիկո Բ»-ում և պարբերաբար մասնակցություն է ունեցել թիմի խաղերին:


Չնայած այս ամենին, ակումբի նախագահ Էնրիկե Սերեսոն հայտնել է, որ ՖԻՖԱ-ի կողմից ստացված  մեղադրանքներն ու  կիրառված պատժամիջոցները համարում է անհիմն:



ՖԻՖԱ-ի կողմից կիրառվող պատժամիջոցը` մեկ տարով զրկել նոր ֆուտբոլիստներ գրանցելու հնարավորությունից, վերաբերում է նաև երկու ակումբների երիտասարդական թիմերին: Սա բացատրվում է նրանով, որ ակումբները հնարավորություն չունենան իրենց երկրորդ թիմերում խաղացողներ գրանցել և այնուհետև ներառել հիմանական կազմում:



ԿԱՆ ԱՐԴՅՈ՞Ք ԱՅԼ ՕՐԻՆԱԽԱԽՏ ԱԿՈՒՄԲՆԵՐ

Այս պահին ՖԻՖԱ-ն հետաքննություն է անցկացնում պարզելու իսպանական ևս երկու ակումբների` «Վալենսիայի» և «Վիլյառեալի» կատարած տրանսֆերային գործարքների օրինականությունը: Եվ ըստ իսպանական ԶԼՄ-ների, այս երկու ակումբների նկատմամբ ևս հնարավոր  է կիրառվեն պատժամիջոցներ:

ԻՆՉՈ՞Ւ ԵՆ ՊԱՏԺՎՈՒՄ  ՄԻԱՅՆ ԻՍՊԱՆԱԿԱՆ ԱԿՈՒՄԲՆԵՐԸ


Վերջերս շրջանառվող լուրերի համաձայն, իսպանական ակումբներից բացի, ՖԻՖԱ-ի հետաքննության տեսադաշտում են հայտնվել երկու լոնդոնյան ակումբներ` «Չելսին» և «Արսենալը»: Բայց, ամեն դեպքում ՖԻՖԱ-ն մեծ ուշադրություն է դարձնում իսպանական ակումբներին, որը զարմանալի չէ: Պատճառն այն է, որ Իսպանիայում հայտնված անչափահաս խաղացողների թիվը զգալիորեն գերազանցում է մյուս եվրոպական երկրներում հայտնված խաղացողների թվաքանակին:

ՖԻՖԱ-ի պաշտոնական հետաքննության տվյալներով, անչափահաս խաղացողների ձեռքբերման ընդհանուր թվի 22 %-ը կատարվում է Իսպանիայում:

                                   ՖԻՖԱ-ի պաշտոնական հետաքննության արդյունքները 2014 թվականին


Մադրիդյան ակումբների երկրպագուներին մնում է միայն սպասել և հավատալ իրենց սիրելի թիմերի անմեղությանը:

«Wyscout». Հեղափոխություն ֆուտբոլի տրանսֆերային և սկաուտական ոլորտում

Ձմեռային տրանսֆերային պատուհանը  բավականին անհանգիստ ժամանակահատված է ֆուտբոլային մարզիչների, գործակալների, սկաուտների և ակումբների գործադիր տնօրենների համար, քանզի  մրցաշրջանի միջին հատվածում թիմում էական փոփոխություններ կատարելը միշտ էլ դժվար է:

Ոչ միայն ձմռան, այլ նաև ամառային տրանսֆերային պատուհանի ժամանակ, թիմերի կողմից ձեռք բերվող տրանսֆերները պետք համապատասխանեն տվյալ թիմի խաղամակարդակին և ակումբի բյուջեին:

Երբևէ ձեզ մոտ հարց չի առաջացել, թե ինչպե՞ս են ընտրվում ֆուտբոլիստներն այս կամ այն ակումբի համար: Ինչպե՞ս են մարզիչներն ու սկաուտները շատ սեղմ ժամկետներում տեսնում և գնահատում իրենց պոտենցիալ նորեկների խաղային որակները:

Ավելի քան տաս տարի է, ինչ ֆուտբոլային ակումբների սկաուտական խմբերին և մարզիչներին  իր ծառայություններն է մատուցում համաշխարհային ճանաչում ունեցող «Wyscout» ընկերությունը, որը մասնագիտացված է ֆուտբոլային վիճակագրության և տեսավերլուծության ոլորտում:

«Wyscout»-ը ստեղծվել է 2004 թվականին իտալական փոքրիկ Կիավարի քաղաքում: Ընկերության հիմնադիր և ներկայիս գլխավոր գործադիր տնօրեն Մատեո Կամպոդոնիկոն «Sky Sports»-ին տված հարցազույցում պատմել է, թե ինչպես այսպիսի միտք ծնվեց նրա գլխում և ինչ դժվարություններ առաջացան սկզբնական շրջանում:

«Մի գեղեցիկ օր ինձ մոտ միտք առաջացավ, որն իմ կարծիքով կարող էր փոխել ամբողջ ֆուտբոլային աշխարհը: Հաջորդ օրը ես եկա գրասենյակ և որոշեցի իրագործել մտահղացումս: Ես գնեցի տեսախցիկ և համակարգիչ ու մենք սկսեցինք  նկարահանել տեղական թիմերի հանդիպումները: Շատ լավ հիշում եմ, երբ գնացի տեսախցիկի համար եռոտանի գնելու, գումարս չբավականացրեց տեսաերիզների և ձայներիզների համար»: 

 «Wyscout»-ն իր առաջին ինտերնետային տարբերակը թողարկել է 2008 թվականի մարտին: Անցել է գրեթե 8 տարի և արդեն իսկ 32 հազար պրոֆեսիոնալ ֆուտբոլային ակումբներ` շուրջ 70 երկրներից, օգտվում են այս ընկերության մատուցած ծառայություններից: Իսկ անգլիական  «Արսենալն» ու «Մանչեսթեր Յունայթեդը» դասվում  են ընկերության ամենաակտիվ օգտատերերի շարքին: Մատեո Կամպոդոնիկոն խոստովանում է, որ այսպիսի արագ աճն ու ճանաչումն իրեն հաճելիորեն զարմացրել է:


«Ի սկզբանե գաղափարը կայանում էր նրանում, որպեսզի օգնեինք իտալական ակումբներին, քանզի մենք կարծում էինք, որ իտալական ֆուտբոլը զգալիորեն հետ էր մնացել մյուս եվրոպական առաջատար առաջնություններից: Մենք փորձեցինք ստեղծել մի նախագիծ, որը կօգներ իտալացի մարզիչներին նոր տաղադավոր ֆուտբոլիստներ հայտնաբերելու գործում: Եվ այս տարիների կատարած աշխատանքի շնորհիվ հիմա արդեն մենք համարվում ենք նշանակությամբ երկրորդ խոշորագույն ֆուտբոլային կառույցն ամբողջ աշխարհում` զիջելով միայն ՖԻՖԱ-ին»: 

 «Wyscout»-ն ակումբներին հնարավորություն է տալիս փնտրելու նոր ֆուտբոլիստների ամբողջ աշխարհով` ընտրելով այն չափանիշները, որոնք պետք է ունենա թիմի պոտենցիալ նորեկը: Մատեո Կամպոդոնիկոյի խոսքերով  «Ֆիորենտինայի» վինգեր Ֆեդերիկո Բերնարդեսկին և  «Բոկա-Խունիորսի» հարձակվող Ջոնաթան Կալյերին կարող են համարվել ընկերության մատուցած ծառայությունների ամենաարդյունավետ պտուղները:

              «Wyscout»-ի գնահատականով Ֆեդերիկո Բերնարդեսկին արժանի է հետաքրքրության:



 «Մենք ուսումնասիրում ենք ֆուտբոլիստների ամբողջ աշխարհից, բայց ինչպես հասկանում եք ծառայությունը վճարովի է: Եթե դուք ցանկանում ենք գնել այս կամ այն ֆուտբոլիստին, մեր կողմից տրամադրվող օբյեկտիվ ինֆորմացիայի շնորհիվ դուք կարող է ավելի լավ պատկերացում կազմել խաղացողի մասին»:


Մատեո Կամպոդոնիկոյի խոսքերով «Մանչեսթեր Յունայթեդի» նորեկ Անտոնի Մարսիալի գերազանց խաղը զարմացրեց բոլորին, բայց ոչ իրեն և իր ղեկավարած ընկերության աշխատակիցներին: Մարսիալի «Մոնակոյում» խաղալու տարիներին արդեն «Wyscout»-ի վերլուծաբանները կանխատեսել էին ֆրանսիացու հայտվելը թոփ ակումբում:

Կամպոդոնիկոն նշում է, որ «Wyscout»-ի պահանջարկը ամբողջ աշխարհում գնալով աճում է:

«Այսօր սկաուտական աշխարհը ավելի ու ավելի է ընդլայնում իր ուսումնասիրման հորիզոնները: Մեր աշխատակիցների քանակը աճում է, քանի որ, շատ ակումբներ անընդհատ փորձում են մեր օգնությամբ տեղեկություններ ստանալ հազարավոր ֆուտբոլիստների մասին: Օրինակ` կան ակումբներ, որոնք ցանկանում են տեղեկություններ ստանալ Ուրուգվայի երկրորդ դիվիզիոնում հանդես եկող ֆուտբոլիստների մասին: Մեր ընկերությունը այս պահին չի ուսումնասիրում վերոնշյալ առաջնությունը, բայց հաշվի առնելով մեծ պահանջարկն ու երկրում ֆուտբոլի բարձր մակարդակը, մենք արդեն մտածում ենք ներառելու Ուրուգվայի առաջնություններում հանդես եկող ֆուտբոլիստների տվյալները մեր ընկերության բազայում:

 Բացի այդ, «Wyscout»-ը նոր ծառաություն է մատուցում: Մենք պոտենցիալ նորեկների վերաբերյալ տեղեկություն ենք տրամադրում ակումբներին: Այսինքն, ուսումնասիրում ենք ամբողջ աշխարհում հանդես եկող մինչև 18 տարեկան այն ֆուտբոլիստներին, ովքեր սկսել են հրավիրվել իրենց ակումբների առաջին թիմեր: Եվ ամեն շաբաթ թարմացնում ենք այդ ֆուտբոլիստների կատարած գործողությունների ինֆորմացիան:
 «Wyscout»-ը ևս մեկ նոր գաղափար է մշակել` երկու տարբեր ակումբներում հանդես եկող և միևնույն մակարդակն ունեցող ֆուտբոլիստների համեմատությունը: Այսինքն, մեր հաճախորդները հնարավորություն կունենան համեմատելու երկու տարբեր թիմերում հանդես եկող ֆուտբոլիստներին ավելի մատչելի և հարմար եղանակով»:

«Լեսթերի» գլխավոր մարզիչ Կլաուդիո Ռանիերին ևս օգտվում է «Wyscout»-ի մատուցած ծառայություններից:


Ընթացիկ ամիսը ծանր է լինելու «Wyscout»-ի աշխատանքային թիմի համար, քանի որ եվրոպական գրեթե բոլոր ակումբները փորձում են ամրապնդել իրենց կազմը: Բայց, ընկերության գլխավոր գործադիր տնօրենը, ոչ միայն չի տրտնջում, այլ նաև շատ հպարտ է,  իր և իր թիմի կատարած աշխատանքով.

«Ես հպարտ եմ, որ մենք այս ամենը սկսել ենք զրոյից և հասել նման բարձունքի: Սկզբնական ներդրումները կազմել են ընդամենը 1000 եվրո և մենք չենք ունեցել կապեր ֆուտբոլային աշխարհում: Իսկ հիմա, «Wyscout»-ում աշխատում են վերլուծաբաններ, ովքեր նախկինում եղել են ֆուտբոլիստներ կամ մարզիչներ:
 Կատարված աշխատանքի որակը բարձր պահելը շատ կարևոր է, քանզի մենք գիտակցում ենք, որ գործ ունենք աշխարհի լավագույն ակումբների հետ և ոչ միայն: Հիմա կատարվող տրանսֆերային գործարքների առյուծի բաժինը կատարվում է մեր օգնությամբ: Շատ են լինում դեպքեր, երբ ֆուտբոլային գործակալները ինձ ասում են. «Մատեո, ես այդ գործարքը իրագործեցի»»: 



«Wyscout»-ը ոչ միայն տրամադրում է մանրամասն տեղեկություն հազարավոր ֆուտբոլիստների վերաբերյալ, նաև խթան է հանդիսանում ակումբների, գործակալների և սկաուտների շփմանը: Սկսած 2011 թվականից «Wyscout»-ը գրեթե ամեն տրանսֆերային պատուհանից առաջ կազմակերպում է գագաթաժողով, որին մասնակցություն են ունենում գործակալներ և ակումբների գործադիր տնօրեններ ամբողջ աշխարհից:


«Wyscout»-ի առաջին գագաթաժողովը տեղի է ունեցել 2011 թվականին Միլանում:
«Գագաթաժողովի գլխավոր նպատակն է «Wyscout»-ի տրամադրած ծառայությունները միավորել պայմանագրերի կնքման հետ: Ակումբների գործադիր տնօրեններին և սկաուտներին դժվար է հավաքվել մեկ վայրում, և հենց դրա համար էլ մենք մշակեցինք այս նախագիծը»,- նշում է Մատեո Կամպոդոնիկոն:

Գագաթաժողը կազմակերպվում է տարվա մեջ 2 անգամ` ամեն տրանսֆերային պատուհանից առաջ: Յուրաքանչյուր գագաթաժողով տևում է երկու օր:

Ակումբների ներկայացուցիչները տեղավորվում են այբբենական հերթականությամբ:
Եվ ցանկացած ակումբի ներկայացուցիչ ունի հնարավորություն շփվելու այն ֆուտբոլիստի գործակալի հետ, որի տրանսֆերը ցանկանում է ձեռք բերել իր թիմը:

 Ավելի ճիշտ կլինի ասել, որ հետևյալ նախագիծը ավելի շատ օգնում է փոքր ակումբներին: Նրանք հետևում են երիտասարդների ամբողջ աշխարհից: «Wyscout»-ի միջոցով ծանոթանում նրա ունակություններին և արդեն տեղում շփվում ֆուտբոլիստի գործակալի հետ:

Այս նկարում ներկայացված են «Wyscout»-ի մինչ այժմ կազմակերպված գագաթաժողովների անցկացման վայրերն ու ամսաթվերը:

Մի խոսքով «Wyscout»-ը կարողացել է ահռելի փոփոխություններ կատարել տրանսֆերային շուկայում` զգալիորեն բարձրացնելով դրա մակարդակը: